Qtil menyono d’çatawiye bu funoyo dhule QASAD la hçome dsımle u gayso kaboşo dı Turkiya wa çatawiyayde bu gbino du masxoro dı Tışrin bu garbiyo d’Suriya

MASXORO d’TISHRIN, Suriya – U gayso kaboşo dı Turkiya wa çatawiyayde kımdawmi dsaymi hçome barbroye cala fenyotho du qlimo du garbiyo u madınho d’Suriya. Athmıl a’tayisyotho folhoye du gayso Turkoyo uma şoce qamoye dsafrayto, mşarelın dsaymi hçome qaşye cala qıryawotho dkıtne hedor du masxoro dı Tışrin bu garbiyo d’Suriya. Bebzabno, sim athmıl hçomo ba topat dlışşalın hul adyawma safrayto. Ubi netiçe da hçomani hew husrone momunoye rabe dilonoyith la benyone da bote da falohe dkıtne masre camu masxoro dı Tışrin. 

A’haylawotho d’Suriya demoqratoyto d’QASAD bu funoyo dhulın la hçome dsımlın a’çatawiye dı Turkiya cala fenyotho du garbiyo du masxoro, qtil u mçarıh menyono menaye. 

Camgabıdathe, hew husrono momunoyo rabo la bote u mulkone da comure, ba hçome qaşye dsımle athmıl u gayso Turkoyo ba topat cali qritho d’A(h)mad Munir bu macırbo d’Kobani. Bebzabno, a’tayisyotho Turkoye du qrobo sımlın athmıl arbıco hçome cali qritho d’Ğasaq dıknıflo hedor du geşro d’Qaraqosaq. Ubi netiçe hew husrono momunoyo rabo. 

Ubi gbino du qrobo dı Dayr (H)afer, a’çatawiye dı Turkiya mnaselın dhıçmi cala nuqazyotho d’QASAD, elo a’mharbone maklelın u hçomaththe u sımlın cuqobo cal kunoşo da çatawiye. Bu cuqobano dsim, mçarıh menyono d’çatawiye. 

M’gabo hreno, a’gude du sutoro di athto di YPJ msıklın arbıco farsufe mzayne bi mditho di Hasake. A’farsufani kımtaybiwo dsaymi hçome, bnişo dımharhızi i mşaynutho wi şalyutho di fnitho. Lfuth u buyono dıfris mi YPJ, mahıt ido cal hamşo tfıngat dkıtwolın a’farsufani dıkmisım ucdo buqore acmaye.