Mfarqıco cito catıqto b’Turkiya b’Kayseri

A ganowe da athare b’Kayseri d’Turkiya, mfarqaclın u bınyono d’cito catıqto dıkducro lu zabno da Hithoye.

 Elo u tehriwo da citotho catiqotho b’Turkiya, kmahwe hawi mede kyonoyo u noşo lkımşayıl cali ctiduthathe.

I citathe dkıtyo mu zabno da Hithoye kmidoco ma comure d’Develi d’Kayseri bu ışmo Minaret Kaya. İ citathe mfarqıco bıthır ma foqucotho dmahıt eba ma ganowe da athare. A comure di şawtho, krıhlın u furqocano di cito catıqto u mawdaclın, dıklozım dmitaklın a camle lo qonunoye dkobın husrono rabo la dukotho catiqotho.

Ğer comure di mditoste mırlın; Haşo raboyo dıha hoze ashifotho di citathe i makthabzabnoyto dheş kiba surotho rşime cala şuronayda. U furqocano di cito, qento rabowe la haye da comure u la dukotho catiqotho hrene.

Comuro hreno mırlın; İ şultonutho klozım tawtır dnufqo moro la dukotho catiqotho dkito bu athro. Dothe dmisım buhono calu furqocano, kibın dmiqafın a hayobe, elo camıhbol noşo lo haruwle ma dukothani.

 Ğalabe ma citotho catiqotho du camaydan, dan Armınoye uda Yawnoye b’Turkiya hariwi u nafili, ğer mıstacmıli xıd dukotho da haywotho uğerste bı idactho shifi cal dlo hiw yuqro lu makthabzabno catiro da came Mşihoye du athro.