Mido isbutho du sxoro d’HDP bu bethdino d’Turkiya

Bıthır mıd u gabo du Zawco Athronoyo-MHP dkıtyo cami şultonutho du rişqutno Erdoğan tlıble dmitaqimo i hasinutho da qoyume di HDP u dmısxır u gabo, mido i sbutho du sxoro d’HDP bu bethdino d’Turkiya.

 Bu zabno du parlamento d’Hollanda krıhle u qedomano di şultonutho d’AKP lu gabo d’HDP’ste, hkımle u bethdino d’Omid 6 eşne u 3 yarhe hbuşyo li rişonitho zawgoyto d’Sur Hatun Yıldız.

U rişono du gabo du Zawco Athronoyo-MHP d’Turkiya Devlet Bahçeli dkıtyo masro bu gabo di Kinutho udu Qyomo-AKP, naqla hreto mkararle iqroytayde lu bethdino, d’soxır u gabo Demoqratoyo da Came-HDP ma thome di marhıbonutho.

Bahçeli tlıble mu Yargıtay umu bethdino du nomuso esonoyo dmabdın buhone u dmaqimi i HDP u mawdacle’ste, dkıtne hadire dım’aydi dmitaqimo i hasinutho d’22 qoyume d’HDP; beynothaye i rişonitho zawgoyto Pervin Buldan.

Cali qroytathe dhawyo, mawdıc du bethdino mabdele buhone bi sbuthathe, elo İYİ parti dkıtyo bi rişonutho d’Meral Akşener m’akadla u mırla; Ahna lıkmqadmina b’samyutho li sbuthathe di hasinutho da qoyume di HDP dkıtyo bu taro du plan hatho du rişqutno Erdoğan. Gıdmcaqbina i sbuthathe towo ubu şıkılano gıdmaydina u fusqonaydan. İ dacwathe mabdıyo, leşan dlo mıdroşi a qetre hrene dkito bu athro.

Elo bu zabno du qedomano di şultonutho d’Turkiya l’HDP kımdawmo, u bethdino d’Omid hkımle i rişonitho zawgoyto d’Sur-Hatun Yıldız l’6 eşne u 3 yarhe hbuşyo b’Omid. Yıldız’ste xıd hadome hrene d’HDP mahto bu hbuşyo ma thome du snodo d’tukoso marhıbono. Cala msokani di HDP’ste, mqadamwole u gabo Sosyalist d’Hollanda rmoyto ubi netiçe da droşe dhawın, mahwele u parlamento hfuxyo u mawdacle, dhani camle mqabıl di demoqratoyutho’ne.