Mor Bşara Alraci mzaharle mu qento dkito cali ithutho d’Lebnon u da bnaymothoyayda

İ qadişutho du fatıryarxo di cito Suryoyto Marunoyto Mor Bşara Bıtrıs Alraci, mzaharle mu qento dkito cali ithutho d’Lebnon u da bnaymothoyayde dilonoyith a’Mşihoye, bu taro mi zictho dkito mi golutho dkiba dhuyo mfothıd du kriz momunoyo qaşyo d’Lebnon.

 U zuhorano d’Mor Bşara Alraci athi luhwoyo bi lqoyto dhawile bu Vatikan cami qadişutho du papa Mor Fransis Qadmoyo.

İ qadişutho du Papa Mor Fransis Qadmoyo, mıstaqbele athmıl bu Vatikan, i qadişutho du fatıryarxo di cito Suryoyto Marunoyto Mor Bşara Bıtrıs Alraci dmaslamlele taşroro rwiho cali aykanoyutho d’Lebnon, u naqla hreto mqadamle zminutho li qadişuthayde d’soyım socurutho lu athro d’Lebnon.

Bebzabno, fatıryarxo Alraci bi lqoytathe maglele calu qento u cala casqwotho dıkloqelın Lebnon, bu taro da şuşote qlimoye dkowın u du kriz folitiqoyo gawoyo du şekolo di şultonutho d’Lebnon. İ qadişuthayde mawdacle du krizano maqşele zıd i aykanoyutho momunoyto dhawyo celtho di golutho u di faqirutho. Alraci grışleste u zuhoro calu furqoco du lmino d’Bayrut dıshıfle falqo rabo mi erişkoyto dıkhoyın ebe a’Mşihoye, udlırğışlın dmahwe elaye yasifutho mi şultonutho.

Camgabıdathe, fatıryarxo Alraci grışle u zuhoro cali zuctho dkıtlın a’Lebnonoye dmivayıc u standard du athro xıd mathlo di ciyeşe mşawtafto bayn da tawdiyotho, u mzaharleste dkito qento cali ithutho d’Lebnon uda nabnayde dilonoyith a’Mşihoye u mırle “kito zuctho cala Mşihoye du madınho kulle ma gedşe dhawın b’Fleşt, b’Suriya u bu Iraq udhawın celtho d’golutho rabtho da Mşihoye. Ubu şıkılano u madınho kibe dımvayıc agawne mşahılfe dkımathlıne a’came u tawdiyotho dıkhoyın bu qlimo”.

Camgabıdathe, u fatıryarxo di cito Suryoyto Marunoyto mawdacle d’Lebnon kıtle sistem d’ruhe dıktore dhowe dilonoyo bu madınho u bıbritho, elo i zuctho dkito mu kafno wu renyo di golutho fayış kul dkothe kzaydi b’hawnıd da Lebnonoye dıkzayci cali ctidutho da nacimathe, u mawxa Mor Bşara Alraci mawdacle dıklozım meqım mıdşofıc u zabno dmisım mede b’surhobo, laşan dmitaxlıs Lebnon mu krizayde.

Megabo hreno, Papa Mor Fransis mawdacle dıksonıd Lebnon u kmahwe awyutho camu camayde, u makadleste dkımsale aminoyith laşanaye.