Mor İğnatiyos Yusuf III Yunan dıqle u noquşo du qento du qşoco da Mşihoye d’Lebnon

U fatıryarxo di cito Suryoyto Qatholiqoyto Mor İğnatiyos Yusuf III Yunan, dıqle u noquşo du qento du qşoco da Mşihoye d’Lebnon, en dlo misamlın mede ma hayle du macırbo. Ubebzabno, a citotho b’Yurdnon mzaharlın calu qşoco di Mşihoyutho bu athro, bıthır mıd naqıs u menyonathe l’2%.

Camgabıdathe, a citotho du camaydan dkıtne b’Suriya ubu Ciraq kımdawmi dmasırhi hsayo u efesqufe hathe, u dobın sabro li Mşihoyutho dmitawlıdo me hatho b’Bethnahrin.

U rişono di cito Suryoyto Qatholiqoyto Mor İğnatiyos Yusıf III Yunan, makadle di ctidutho da Mşihoye d’Lebnon gıdhuyo qşoco mu athro, en du macırbo dlo soyım mede. İ qadişuthayde mırle; Sniqutho rabthoyo dmitakılyo i golutho da Mşihoye me Lebnon. Du şroro u kriz momunoyo wu cnufyo ducdo gıdqoşıc u kenşo ida u macırbo dlo mcadır a Mşihoye d’Lebnon.

Fatıryarxo Yunan krıhle u nfoqo da Mşihoye mecathro dıkmote u menyono da Mşihoyayde l’2 mılyune, u mırle; kıtlan zuctho du krizano dhowe b’zabno dkmo ışne i harayto da Mşihoye b’Lebnon ubu Madınho Mescoyo kule in dımdawım u krizano xıd dkıtyo ucdo, ahna harkewayna me alfayo d’ışne u tcınlan kull şıkıl di dişutho. Lfuth ha ma mşale Lebnonoye, kull yawmo kmitawfıq 5 alfo passporte, ukmisım taxmin d’3 alfo menaye da Mşihoye’ne dgınufqi mu athro. Ahna layban dımmina lan abne da marciyothaydan fuşu b’Lebnon, cal dgıdımmilan: aydarbo kiban dnufqina mqabıl di aykanoyuthe. Lo fayışlan sabro bu datidaydan?.

Camgabıdathe, a citotho b’Yurdnon mahwelın ilo thnihuthathe cali golutho da Mşihoye dıkzaydo mu athro, u mawdaclım du medano kım’athır cali şkihutho di cito bu athro. Lfuth i dayira du mnoyo gawonoyo d’Yurdnon, u menyono da Mşihoye naqıs l’2% bi şato da 2020 bıthır mıd kıtwe meqım 6%. U rişono di cito du qadişo Mor Gewargiyos da Suryoye Malkoye Orthodoksoye xuroyo Athanasyos Xaled Qaqiş, mawdacle da Mşihoye kımgalwın me Yurdnon mi celtho du kriz momunoyo, umi zıhniye qşitho di Maşılmonutho.

Mawxaste u xuroyo kali cali ulsoyutho dmisım quyomo folitiqoyo u tawdithoyo bu kenşo Yurdnono’yo. Camgabıdathe, a citotho du camaydan kımdawmi dmasırhi kohne u hsayo hathe xıd dawse dkobo sabro lu mawlodo di Mşihoyutho me hatho b’Bethnahrin. Adyawma, masrıh xuroyo Thabıt Bulıs hasyo mcadrono li marcitho d’Alqoş bu syomido du fatıryarxo Mor Luis Rofael Qadmoyo Sako. U hasyo hatho Thabıt Bulıs dfriso i masırhonuthayde hayo b’Suroyo TV, kıtle u zedqo dhowe bıthır u rişono di marcitho.

Bebzabno, i fatıryarxutho di cito Suryoyto Malkoyto Orthodoksoyto mnaqela u wakilo fatıryarxoyo Afram Macluli dhowe hasyo metrofolito di marcitho d’Holob bdukthe du hasyo dmeqım Bulıs Alyazaji dhtıfwo ba 2013.