Mor Luwis Rofayel Sako hawile ytawto cam Mustafa Alkadhimi

U rişwazire du Iraq Mustafa Alkadhimi mıstaqbele i qadişutho du fatıryarxo di cito Kaldoyto d’Bobıl Mor Luwis Rofayel Qadmoyo Sako.

Bi ytawtathe d’athyo luhwoyo bıthır mi egartho dımşadrowole i qadişuthayde l’Alkadhimi, grış u zuhoro calu camaydan dıkmidış bi daşto d’Ninwe.

I qadişutho du fatıryarxo di cito Kaldoyto d’Bobıl Mor Luwis Rofayel Qadmoyo Sako u acmeste u mcadronayde hasyo Mor Robert Jırjis, athmıl casriye sımlın socurutho lu rişwazire du Iraq Mustafa Alkadhimi bu qusrayde di şultonutho dkıtyo bi fnitho Yarıqto bı Boğdod.

Bu şuroyo di ytawtathe, Alkadhimi hule i hzaytayde cali egartho di qadişuthayde dımşadrowole ele 02 bu yarhano dı Hzirın, u mawdacle di egartho mgaşamla b’ulsoyutho i aykanoyutho mxarbatto du Iraq, u makadle dıkfolıh b’hexamtho ubu darbo du diyalog laşan dmışroyi a’krize du athro, udmitakle u texiro du admo.

Fatıryarxo Sako bi egartho dımşadrowle l’Alkadhimi, mawdacwole du kriz du Iraq kımdawım cal da gabe uda rişone folitiqoye lımmatın hul ucdo l’awyutho calu şıkıl du sistem folitiqoyo hatho du athro, awkith u Iraq gıdmitarku calu mafhum d’athro mdinoyo, aw demoqratoyo, aw tawdithoyo awste federaloyo. Fatıryarxo Sako mawdacwole ste da rişone folitiqoye heş latne qanice b’athro dıklozım dhowe mtakso, awkith dhowelın mawdyonutho bi hiyoyuthyade ud’howe u zayno balhude bidothıd di şultonutho.

Bebzabno, i qadişuthayde bi ytawtathe mamtele l’bolıd d’Alkadhimi du qetro dıkcaşle u Iraq qetro folitiqoyoyo, u mahwele ste sabro du athrano d’qoyım m’hatho cal rağlothe dilonoyith dlatle i bsirutho da timoyotho kyonoye awste da mkone du haylo barnoşoyo.

Mxasra hreto, Mor Luwis Sako hule mawdconutho cali aykanoyutho du camaydan dkıtyo dişo ba fenyothayde bi daşto d’Ninwe, u grışleste u zuhoro cali batilutho dkito bayn da nabne du camaydan wi sniquthayde l’tarmiyotho momunoye du quyomo di daşto.