Mşakıl koalisyon Kurdoyo b’Boğdod

Grub d’qoyume Kurdoye bu parlamento du Iraq, mşataslın koalisyon hatho bu ışmo; U sabro d’Kurdistan.

 U koalisyonano gıdfolıh leşan dmitarsi a fawde wa bsirwotho dkıtwo me meqım u dıtfıklın a bnaymothoye du qlimo d’Kurdistan l’kafno.

 Grub dıkmişakıl m’15 qoyume Kurdoye şarye u qoyume hrene dkıtne hadome ba gabe u koalisyone dkıtne larwal du gabo demoqratoyo d’Kurdistan udu gabo du huyodo athronoyo Kurdistanoyo, mawdaclın athmıl dımşataslın camıhdode koalisyon hatho bu ışmo “u sabro d’Kurdistan”.

U koalisyon hatho bu knuşyo dsımle lu tboco froso bu benyono du parlamento d’Boğdod, mawdacle dkıtle u nişo dımtarıs afawde wa bsirwotho dşafici, udhawın celtho dmitakfın u barmothoyo du qlimo d’Kurdistan udmitıstacmıl ma gabe folitiqoye rabe laşan u yuthronaththe. Bebzabno, u koalisyon mawdacle dkıtle u nişo dımamın a’zedqe dkıtle u qlimo d’Kurdistan b’gawıd du nomuso esonoyo du Iraq udımdafıc aclaye.

U koalisyon du sabro d’Kurdistan lfuth u buyono dıfrısle lu tboco froso, krofıd i tuhmonoyutho da gabe, du idoloji uda mathhabe, u ksoyım qroyto dmınfıq mqabıl da mşale dmawbelın u athro du Iraq laf aykanoyutho du qento, u bebzabno kobe ağuno laşan dmitahıt şetısto tristo da nesore bayn di şultonutho qentrunoyto d’Boğdod wi şultonutho du qlimo d’Kurdistan, bnişo dmitahwele u camo azedqayde lfuth i şafyutho wa qonune du nomuso esonoyo.

Camgabıdathe, u koalisyon mawdacle dıkmahwe saqıbloyutho qşitho layna gabo folitiqoyo dhowe mqabıl du fasad udu dyoşo du nomuso esonoyo du Iraq.