Mşarele u bethdino dcali sfaryawmo d’Şarli Ebdu

Adyawma mşarele u bethdino d’14 farsufe marıhbone dıkmıthomi dkıtlın mşalutho calu hjomo mzayno dsımwo cali sfaryawmo Franşoyto du karikatör d’Şarli Ebdu bi erişkoyto bı Paris.

U bethdinano kmamte lu bolo uhjomo marıhbono dsımwo meqım hamış ışne, u dımathewole şuroyo di şalqa du cnufyo u di marıhbonutho dsimowa bı Fransa ma Maşılmone tuxmonoye.

7 bu yarho d’Konun u Haroyo i şato da 2015, atre marıhbone Maşılmone Fatıh Sacid u Şarif Kıwaşi dkıtwın mzayne, bu hjomo dsımwolın calu benyono di sfaryawmo du karikatör d’Şarli Ebdu bı Paris, marıswolın buğre cala falohe dkıtwın bgawıd da makıthbe di sfaryawmo. Ubu hjomano dmıdwole cal ruhe u tukoso marıhbono d’Alqacida qtılwo 12 farsufe.

Adyawma mşarele u bethdino d’14 marıhbone dıkmıthomi dkıtlın mşalutho bu hjomo dsımwo meqım hamış ışne cali sfaryawmo d’Şarli Ebdu, baynothaye tlotho marıhbone dlatne hadire bu bethdino, u kmisım taxmin dıqtili b’Suriya bıthır mıdmıştawtafwolın lu tukoso dı Dacış ba nışne dşaficina. Bebzabno, an’14 farsufani kmıthomi bu snodo di marıhbonutho, bi mıştawtfonutho l’tukoso marıhbono u bu tehwiyo d’zayno la marıhbone dıhjımwolın calu benyono di sfaryawmo d’Şarli Ebdu.

Camu bethdino da na’14 marıhbonani, isfaryawmo Franşoyto d’Şarli Ebdu naqla hreto frısla grub d’surotho du karikatör dkımqaşmıri calu nbiyo da Maşılmone Muhammad. A’surotho dıfrıswola Şarli Ebdu cal Muhammad meqım 10 ışne, xlıqwolın ruğzo rabo sa Maşılmone dı britho.