Msik 6 mşale Iraqoye bi dacwa du fasad

Msik ışto mşale Iraqoye dıkmıthomi bi dacwa du fasad, bu taro da fulhone dıksaymolın Boğdod mqabıl di marıhbonutho u du fasad.

 Camgabıdathe, sim hjomo cal konvoy diplomasi Britanoyo bi mditho d’Boğdod, wa haylawotho di mşaynutho du Iraq mfarqaclın 11 qentrune di baytoyutho dı Dacış.

Ahaylawotho di mşaynutho du Iraq msıklın ışto mşale bu taro da cuqobe dıksamlın u rişwazire Mustafa Alkazimi mqabıl du fasad u di marıhbonutho.

Lfuth mabuco Iraqoyo di mşaynutho, u mdabrono di sictho di mşawtbonutho dmeqım Ahmad Alsacidi ha mani dımsiki yo bi dacwa du fasad. Ubebzabno cayni mabuco di mşaynutho mawdacle dkito heş cuqobe dgıdmisomi calqariwo mqabıl dı mşale Iraqoye rabe.

Megabo hreno, i rişızgadutho Britanoyto bu Iraq mawdacla d’foquctho dısnico bi ido mfarqıco b’konvoy diplomasi d’radoyotho Britanoye bı Boğdod, elo i rişızgadutho makadla dlawi husrono bi netije du hjomano.

Uhjomano athi luhwoyo bıthır mıdşafıc kımo şoce calu hjomo dsim adyawma bı tıre soruhe Katyuşa cali fnitho Yarıqto bı Boğdod.

Camgabıdathe, imdabronutho folhoyto d’Alanbar, mawdacla dfayıt b’kaşirutho u cuqobo dmabdewola meqım tılotho yawme, bnişo dmitandıf u mathıbri macırboyo di hiğmonutho d’Alanbar.

Lfuth u buyono dıfris, atayısyotho du gayso Iraqoyo mfarqaclın 11 qentrune di baytoyutho dı Dacış, mahıtlın ido cal atrte radoyotho u zayne mşahılfe u foqucwotho u msıklın ste 9 farsufe dıkmıthomi bi marıhbonutho.