20/03/2021

MUB frısle buyono bi cohnutho da cede dı Ha Nison u du Newroz

U Mawtbo Umthoyo d’Bethnahrin, frısle egartho bi cohnutho da cede 21 Odor u Newroz udı Ha Nison-Akitu du camaydan.

Bu buyonano i Sictho di Rişonutho d’MUB kımmo; A cedani krumzi u sabro da haye mşawtıfe, di methcadronutho udu ağuno di hirutho da came u dıktıcni cayni jawhar.

U buyono d’MUB komır; A cedani meqım alfayo d’eşne bu Madınho Mıscoyo dıkbanwo i sbartho du nuhomo  du mahduro, udu mathyo du rbico, camgabe dıkmisım u nuholathe bşıkılat frişe, elo ktıcni cayni timoyotho. A jeoğrafyat d’Bethnahrin u d’Anatolya dkıtlın u cafro mafıryono, hawın athro lba casrowat grube etnikoye.

Elo dilonoyo mu zabno dmido asas i siyase du qtolğenso du Tukoso d’İttihat Terakki, Bethnahrin u Anatolya mşahlıfi la bethqbure, wu Madınho Mıscoyo mamte lşıkıl dhawi i gihano d’britho. A timoyotho, u sabro, a hiyoywotho da came, ba siyasat dkıtne hdonoye u tuhmonoye mçarbi dmıqşoci.

Kull şato bu mathyo du rbico xıd aydarbo u kyono kımhathıth ruhe bu Newroz ub’Akitu, a cameste kull naqla kmıthnahmi mqabıl da dolume, ksaymi cısyone u lıktorın mu ağunathe leşan dmotın lu şlomo. Xıd Mawtbo Umthoyo d’Bethnahrin wolitho makthabzabnoytoyo aclayna, dmamtena li duktho i lhiqutho dkıtlan la haye mşawtıfe ula cedaydan.

Bu huthomo MUB komır; Hathe mşalutho dıktıcninala leşan da came u leşan di noşuthoyo. Layto haylo dqodır dlohe i barake du cafro, u sabro du xalas wi methcadronutho da came, wu qloco da maye d’Froth u Deqlath. Calu asasano kımcaydina u cedo du Newroz da came dıkımcaydile bsabro d’haye hathe, u dilonoyo kıdorina a şlomaydan lu ağuno di hirutho du camo Kurdoyo uda rişonathe dıkmisomi isolasyon u kımcaydina u cedathe du Newroz.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…