MUB mcayadle u cedo di qyamto bu buyono dıfrısle

U mawtbo umthoyo d’Bethnahrin (MUB) bu buyono dıfrısle kımcayıd u cedo di qyamto d’Mşiho dkımcaydile falqo ma citawotho du cameydan ramhıl yawme dhuşabo.

MUB bu buyoneyde camgabe dıgmahwe u snodeyde la yaqrotho dımwayaclın qnume bu maşıqlano u casqo ksoyım qrayto du cameydan lotım lıhdode u dmahwe awyutho cama falqe kule.

U buyono du mawtbo umthoyo d’Bethnahrin kımşare ba melani a  jamacat dkıtne masre bu mazhab Ortodoksoyo di Mşihoyutho kımcaydi u cedo di qyamto d’Moran Yeşuc Mşiho bu siqumo d’19.04.2020. Bi ohnuthathe kımcaydina u cedo du camo Suryoyo dkıtyo masro bu mazhab Orotodoksoyo. U cedo di qyamto dı Mşiho kmitıstaqbıl mu camaydan umu cılmo Mşihoyo kule ba şartat du qento dı xlıqle u corona virüs. U hano matharle calu şıkıl du ceyodo, cala slawotho tawdithoye, ma hfitwotho kenşoye wu camo dımcayıd hdode. Calathe hem u camaydan u hemste i noşutho kula bi sbutho du ağuno dımqabıl di corona virüs cabiri bı buhrono hatho. Midıd u maşıqlano ktolıb me kul farsufo mu camaydan dımqadım bi mahisutho du snodo dlıhdode.

MUB komır bu maşıqlo haroyano uqdomo du camaydan la lammat di mcadronutho dsımilın a şutose du Mawtbo Umthoyo d’Bethnahrin ba wahde kulle  kmitıstaqbıli b’iqoro rabo. I ruhathe du snodo hem kobo şubhoro lu camaydan, u hemste kobo sabro rabo. Ba yawmani dkıtne casqe, i sniqutho rabtho du camaydan huwe dloyım lıhdode bı hıdoyutho u dfolığ a mkone dkıtle. Ktıcnina i hzinutho dımvayaclan mınyono ma bnaynoşaydan mfothıd du kewo dımbarbız, kfılğina u haşo dıhdode, u jbiroyena dbena ağuno bfusqono kamilo leşan dfayşina cali rağlo. U ağunaydan wi mşalutho umthoyto dkıtlan ktılbo mınayna dmahwena darbo la falqe du camaydan kulle u dbena funoyo la sniqwotho dkıtte. Kul farsufo u iqartho mdu camaydan, hayko dı britho dhuyo tır dhuyo, kibın dmotın lşutoso mdu Mawtbo Umthoyo d’Bethnahrin u dmawdıci a talabaththe. Ba şartat casqani kul noşo dobe tacbo leşan dımqafe şuryono, inaqayo gıdmitahwe u funoyoo di sniqutho du camaydan bi ruho du floğo du cedo di qyamto.

Xıd Mawtbo Umthoyo d’Bethnahrin taht kulle a şartat morıd dsıbyonona dkiban dımmathlina u camaydan folitiqoyo, marduthoyo, makthabzabnoyo u kenşoyo, wu medano naqla hreto m’akıd bu pratik dıksaymina. Ktılbina husoyo la abne du camaydan dımvayacce a hayaththe bu maşıqlano, u ktılbina rişo basimo la eqaryothaththe u hulmono la krihe la kayive. Me gabo hreno naqla hreto kımakdina ahna sa şutose, sa came u si noşutho dkobın ağuno mqabıl du kewanona. Naqla hreto kımcaydina u cedo di qyamto du camaydan uda rişone tawdithoyeydan, u ksaymina qroyto lkul noşo li mıthcadronutho ulu floğo b’sabro leşan dımtena ldactith bhılmono.