MUB mqadamle egartho d’buyoe li eqartho dı mnoho Cabo Coşar Beth Hane

U Mawtbo Umthoyo d’Bethnahrin MUB mqadamle egartho d’buyoe li eqartho dı mnoho Cabo Coşar Beth Hane.

Mnoho Abo Coşar mu yawmo qamoyo mcadrono u sanodo du ağuno umthonoyo udu Froshezwaydan d’Suroyo TV’we.

U Mawtbo Umthoyo d’Bethnahrin bu şuroyo di egarthayde da buyoe kmawdıc, u myaqro du babo di Hadımto du Mawtbo Umthoyo d’Bethnahrin Gule Coşar wu ahuno di hadımto Nafo Coşar; Abo Coşar Beth Hane bu siqumo 21 ob bcumro 89 ışne mi celtho di sobutho, bi mditho d’Midyad b’Turabdin mhase.

U mhasyo du holo Abo Beth Hane dmawlıd bu siqumo 10 şbot 1932 bi mditho d’Midyad b’Turabdin, i bethzawgayde dkıtyo i hılto Meryem Coşar Be Şamosho Jije Be Hawşo dımhasyo meqım şato, babo dı 3 abne u 4 bnothoyo.

U mhasyo bıthır me cumro yarixo dcayişwo bi mditho d’Midyad b’Turabdin, dımgalwele cami eqarthayda l’Urifi lu athro d’Almanya, xıd kul babo bgawıd di eqarthayda huwle tacbo u  macışle u athro i mardutho, i hubo, u leşono, wi haymonutho du camaydan dkıtle li tawdithayde.

U Mawtbo Umthoyo d’Bethnahrin mawdacle, u mhasyo du holo Abo Beth Hane mi hubo dkıtwole lu athrayde bıthır mi mşawtbonutho huwwe wi bethzawgayde i hılto Meryem dacıriwo li mditho dmawlıd eba l’Midyad Turabdin. U holo Abo wi eqarthayde mu yawmo qamoyo hol dımhase mcadrone u sanode du ağuno umthonoyo dıkmitahwe mu taraf du Mawtbo Umthoyo d’Bethnahrin wu şutoso du Froshezwo d’Suroyo TV.

MUB bi egartho da buyoe mırle “Ahnaste xıd ağuno bi idactho du tacbo u du dawro dhawilın a babonaydan, bi hubo di mothonoyutho udi umthonoyutho kbena ağuno u kmacışina a uhdonaththe, a hasrat dıththe laşan i hirutho.”

Xıd Mawtbo Umthoyo d’Bethnahrin bu şuroyo kımqadmina a buyo’aydan la hawrotho hadome Nafo u Gule Coşar  u li eqartho mothonoyto du mhasyo holo Abo Coşar Beth Hane kfılğina u haşo mayiro du babano didan u mothonoyo acmayye, u ktılbina m’Aloho dhowe dukthe i malkutho şmayonitho.