MUB mtayable u lumodayde u şatonoyo bu slogan Hdoyutho Umthoyto

U Mawtbo Umthoyo d’Bethnahrin mtayable u lumodayde u şatonoyo bu siqumo d’ha bu yarho d’Ob da 2021 bu slogan-Hdoyutho Umthoyto.

Bu lumodano dmıştawtıflele 120 hadome u hadımyotho di sictho mdabronitho dıkmaydi wolitho ba wahde uba şutose kulle, mid fusqone cala tahrazyotho du fulhono da wahde dkıtle u mawtbo fulhono ebeye.

U konferansano dımşarewole b’qatinto d’şetqo cali ruho da Sohde, mdawamwole bu mamlo du rişono d’MUB Hawro Michael la hadome kulle dkıtwın hadire bi duktho ubu darbo du teknik. Bıthır kle cala şuşote folitiqoye du maşıqlo, cali aykanoyutho dıkcoyış eba u camaydan, u cali ulsoyutho di hdoyutho umthoyto. Dilonoyo griş u zuhoro calu gzomo awkith calu tehdit wu qento dkito calu camaydan u cala Mşihoye kulle bu Madınho Mıscoyo, u cala hedıriyat dıksaymi a grube jihadist bi sbutho d‘hçome hathe.

Mawxa mbayno i ulsoyutho da fulhone dıkmisomi ba wahde d’Suriya, Lebnon, Cıraq, Turkiya, Urifi u Amerika beyn da falqe du camaydan Suryoyo Othuroyo Kaldoyo Oromoyo, leşan i zoxuthaydan i umthoyto. Bu maşıqlo di şato dşafıcina ba wahde dıkmaşe MUB fulhone ebeye, mtayıb fulhone ma şutose folitiqoye, kenşoye, marduthoye, folhoye, du tbocofroso, da neşe, di claymutho, du momuno, du yulfono uba casrowat şutose hrene. Cıl ma şartat d‘xlıqle u pandemi, ba fulhone dımtaybi beyn du camaydan, u larwal mu camaydan, u nişo wa talab dkıtwo mamtın lu yawmoyo. Ba dawsat dımhalqi ba haqle folitiqoye, tukosoye, diplomatikoye udu tbocofroso mnase dmitahwe funoyo lu maşıqlo, wu ağuno di hirutho du camaydan tre cali rağlo u mathıl.

Ba falqe du athro dıkhoye u cameydan mahıt klayto mqabıl da siyasat du qşocayde u bebzabno tlib ma hayle Emwothoye dhowe mawdyonutho ba zedqe du cameydan ba dukothe dıkhoye. Bi şato dşafıc bi sbutho di hdoyutho umthoyto b’nişo dmihalıq dawsat hathe hawi lqoyotho, knuşye u nuhole cam mınyono ma mathlone da şutose folitiqoye, marduthoye, tawdithoye u kenşoye du camaydan. Midıd ba şartat dıkcoyış u camaydan i hdoyutho umthoyto kıtla ulsoyutho rabtho. İ wolitho asasi dkull şutoso u tukoso da wahde kulle klozım dsaymi fulhono leşan di hdoyutho umthoyto beyn da falqe du camaydan kulle.

Bu huthomo du Konferansa midi a fusqone da fulhone da tahrazyoto da wahde du ağuno dıkmitahwe leşan i hirutho du cameydan: Leşan du camaydan dmitawdıc bu Madınho Mıscoyo ubu ray dbritho dmitayıb konferans, panele u knuşye.

Leşan di hdoyutho umthoyto du camaydan dmisım lqoyotho cama mmathlone da gabe u şutose folitiqoye, u cama mmathlone di cito. Bi sbuthathe leşan dmitayıb platforme, dmisım fulhone.

Leşan dmitagle cali zıhniye dıksaymo tehdit a Mşihoye du Madınho Mıscoyo dcayşi bu athrathe bşıkıl mşayno, b‘hirutho dcayşi i haymonuthathe, dmitayıb fulhone b’darğo Emwothoyo.

Leşan du camaydan dmimathıl siyasi dmisım fulhone la guboye dıgımitaybi bu Cıraq, Lebnon, Turkiya ubu garbay madınho d’Suriya.

İ Mdabronutho yothoyto du garbiyo udu madınho d’Suriya leşan dmitawde eba beyn Emwothoyo, dmitayıb fulhone diplomatikoye.

Leşan dmiqadım snodo lu camaydan dıkcoyış bgawe du kriz momunoyo udu embargo b’Suriya, Lebnon ubu Iraq dmitayıb kampanyat.

Mcal fothe d‘Turkiya kımanqıso a maye da nahre d‘Froth u Deqlath, bhın ma qlime dıkhoye u camaydan kito şuwolo da maye u kowe naşifutho. Mi celthathe leşan dmitawe funoyo li sniqutho da maye du camaydan dıkhoye bi Hasake dmitayıb kampanya di mcadronutho.