16/06/2020

Nejirvan Barzani makadle dıklozım ikinutho dmişarıro

U rişono du qlimo d’Kurdistan du Iraq Nejirvan Barzani, makadle dıklozım i kinutho dmişarıro, u dmimıd hşowo ma farsufe kulle dkıtlın sawco ba gunhe dsımle u tukoso marhıbono d’Dacış cala Mşihoye u Ezidoye wa came tawdithoye hrene.

 Me gabo hreno, i şultonutho d’Yurdnon msıkla tılotho farsufe dıkmıthomi dıfrıslın maqırhınwotho, dkımhaqri ebaye a citotho da Mşihoye wa slawothathe.

 U rişono du qlimo d’Kurdistan du Iraq Nejirvan Barzani, hawile esore bu telefon camu mşawrono dilonoyo d’Emwotho Mhaydotho Karim Xan dkımrayşın u grub Emwothoyo da buqore dcala gunhe dsımle u tukoso marıhbono d’Dacış.

A esorani hawın beynothaye athmıl meqım mıd mqadım Karim Xan u taşrorayde lu Mawtbo di Mşaynutho d’Emwotho Mhaydotho cala fulhone dıksoyım u grub mbaqrono bu Iraq. Ba droşe dhawın baynothaye, Karim Xan mahkele l’Barzani cala fulhone dıksoyım  u grubayde, bnişo dmişarıro i kinutho la debhe da gunhe d’Dacış bu Iraq.

Me gabo hreno, Barzani naqla hreto makadle dıksonıd a fulhone du grub Emwothoyo da buqore u mırle; Klozım dmiqadım li kinutho kull farsufo dkıtle sawco aw mşalutho cala gunhe dsimi mqabıl du camo du qlimo d’Kurdistan udu Iraq wa gunhe dsimi cala Ezidoye, cala Mşihoye ucala came tawdithoye hrene.

Be bzabno, Barzani makadle du kuşoro du fulhono du grub mbaqrono ğalabe ulsoyoyo, cal dgıdhowe zuhoro qaşyo u qriho dgıdmimıd hşowo ma farsufe kulle dsımlın a gunhe, u gıdmişarıro i kinutho la yaqrotho da debhe. Me gabo hreno, u mqimdino gawonoyo d’Yurdnon athmıl msıkle 3 farsufe dıkmıthomi bi fıtne tawdithoyto, cal dıfrıswolın bi şabtho dşaficina kthawyotho dkımhaqri a Mşihoye wa slawothaththe bıgawe da citotho.

Ba dafe kenşoye du nawlo frıswo kthawyotho dkibın ruğzo u bceldboboyutho mqabıl da Mşihoye b’Yurdnon. A kthawyothani frisi bıthır mıd maqimi a tedbire dımahtiwo mqabıl du virus d’Corona, u dımşarewolın a Mşihoye ba slawothathe bıgawe da citotho.

Check Also

Mor Nejib Musa Mixayel mdagele a tebe dkımdacın d’150 farsufe mu camaydan mgalwelın ba casro yawme haroyani larwal du Iraq

U rişono di marcitho d’Mawsal di cito Kaldoyto d’Bobıl hasyo Mor Nejib Musa Mixayel, mdage…