06/03/2021

Papa Mor Fransis sımle socuruhto li cito d’Sayyıd Al Najat

I socurutho du Papa Mor Fransis qadmoyo lu Iraq, kımdawmo dmıdroşo beyn du cameydan u beyn da came du Iraq.

Bu zabno dıkmdawmi a droşani athmıl iqadişutho du papa sımle socurutho li cito dı dmiş ışma bu qtolcamo dhawiwo eba bi şato da 2010 dı qtilwo ba casrowat mu cameydan cam tre kohne.

Athmıl bıthır ma lqayotho ruşmoye dcama mşale u rişone du Iraq, i qadişutho du Papa sımle socurutho li cito makthabzabnoyto dsımwo eba qtolcamo bi şato da 2010 ma marhıbone dhçımwolın calu cameydan bu zabno dkıtwe bi slutho d’Ramşo. A marhıbone u marıswolın bu zaynathe dlo rahme calu camo wa hayle di şultonutho lo qadriwo dmaklın u qtolcamano dsımwo cali cito d’Sayyıd al Najat.

Bu mamlo dsımle i qadişutho du Papa mathkarle a sohde dhulın a hayathe dıbho bi citathe wa sohde du athro du Iraq kule, u mahkele cali casqutho dıkfayti a Mşihoye bu athro wu be bzabno, mathkarle u cnufyo wu qatlo dıkdawım bu Iraq. Bi socuruthathe dli cito d’Sayyıd al Najat sim mamle basime du şlomo uda Mşihoye u camo şerşoyo du athro’yo u ğer.

Adsafroste bıthır mi lqoyto dhawile u Papa camu rişono da Şica Maşılmone Ayatollah Cali al Sistani, laqiste a mathlone da tawdiyotho du Iraq bu madhıbro d’Ur dkıtyo idicto u bayto d’Abrohom u rişono da tawdiyotho dıha Aloho, ube bzabno i duktho makthabzabnoyto du cameydan u Kaldoyo-Suryoyo-Othuroyo.

Ba mamle dsimiste griş u zuhoro cala haye mşawtıfe beyn da tawdiyotho dkito bu Iraq u mahke cal Ur dkıtyo duktho catıqto bu makthabzabno du athro. Camgabe du cameydan dkıtyo fsihoyo li socurutho di qadişutho du Papa Mor Fransis qadmoyo, ha kmıftakır gıdxolıs mu cnufyo, ma qatle umu hboso dkowe cali tawditheyde, cali hiyoyuthayde dkıtyo i hiyoyutho qamayto du athro du Iraq. İ socuruthathe du Papa lu Iraq, kmıfroso hayo bu froshezwo Suroyo.