Paşinyan mıstaqbele u waziro du sutoro du Iraq

U rişwazire d’Armenia Nikol Paşinyan, mıstaqbele athmıl b’Yerevan taşdarto dımrayşıno mu waziro du sutoro Iraq Jumca Sacdoun.

Ba droşe dhawın bi ytawtathe, Paşinyan u Sacdoun kalın cali methcadronutho bu haqlo folhoyo wu tekinkoyo. U waziro Iraqoyo, xıd remzo lu iqoro da Sohde du qtolğenso, sımleste socurutho li qoyumtho da Sohde.

Taşdarto mu Iraq, sımla athmıl socurutho li arişkoyto d’Armenia Yerevan ubu makthbo di rişwazirutho, mıstaqbılo i taşdarto mu rişwazire Nikol Paşinyan u mtayıb ela zawho ruşmoyo. İ taşdarto Iraqoyto mrayşıno mu waziro du sutoro Jumca İnad Sacdoun.

Armenia dıkmfaşqo u Iraq xıd hawro towo bu haqlo da esore marduthoye u makthabzabnoye. U rişwazire Armınoyo mawdacle i fsihuthayde li socuruthathe di taşdarto Iraqoyto uli asirutho dıkmahwıyo Boğdod lu camo Armınoyo dkıtyo bu Iraq.

Ba droşe beynothayeste, kle cala mkone du teqwiyo di methcadronutho beyn du Iraq u Armenia bu haqlo folhoyo, teknikoyo u momunoyo. Lfuth u waziro Iraqoyo, i şultonuthayde kıbco dmarwıho a esorathe cam Armenia bhaqle frişe acmaye bu haqlo di folhutho udu hulmono.

Ba droşani’ste a 2 gabe kalın cal sebwotho frişe wa wazirathe du sutoro mdoyo cal maqırhonutho mşawtafto leşan i methcadronutho dbeynothaye b’13 haqle frişe. Paşinyan mhanele’ste u qedomo du Iraq li sbutho d’Qarabax. Meqım mıd i taşdarto Iraqoyto daciro lu athro, sımla socurutho li qoyumtho da Sohde du qtolğenso dan 1915 u mahwela i iqorayda la Sohde.