Pedersen grışle u zuhoro calu haşo noşoyo dıkloqın a bnaymothoye d’Suriya

U mathlono dilonoyo d’Emwotho Mhaydotho b’Suriya Geir Pedersen, sımle mamlo bu Mawtbo di Mşaynutho d’Emwotho Mhaydotho cali aykanoyutho harayto d’Suriya.

Bu mamlayde Pedersen, grışle dilonoyith u zuhoro calu haşo noşoyo dıkloqın a bnaymothoye d’Suriya bu zabno dıkmdawım u qrobo gawoyo du athro.Pedersen kali cali bsirutho da maye, cala htofe wi marhıbonutho dıkmdawmo b’Suriya.

Bi maqırhonutho dhuwle athmıl u mmathlono dilonoyo d’Emwotho Mhaydotho b’Suriya Geir Pedersen bu Mawtbo di Mşaynutho d’Emwotho Mhaydotho grışle u zuhoro cali sniqutho noşoyto dzayido beyn da bnaymothoye d’Suriya u mırle; Bu zabno du kriz kımdawım hani 10 eşne bıgawe d’Suriya, simi a guboye di rişonutho du athro. A guboyani lıkmısnodi me Emwotho Mhaydotho cal dlatne lfuth a qyome Emwothoye.

Pedersen mawdacle, i aykanoyutho harıwto du momuno, u pandemi di Corona, i golutho, a msoke wa htofe, i marhıbonutho wu dyoşo da zedqe noşoye kımdawmi b’Suriya wu maşıqlo du terkiwo du şlomo kalyo’yo. B’dukotho naqisi a taxtuşe ubğer heş kımdawmi. Elo a thume beyn Suriya u Turkiya klozım dfayşi ftihe leşan u nqolo dımcadronutho noşoyto.

Wu cama hçome dıksaymo İsroyel’ste, kobo i aykanoyuthathe mkono la marhıbone dımdawmi a hçomathe b’Suriya. Calu haqlo du momuno Pedersen mawdacle du timo da zuze d’Suriya-i lira nahito ğalabe wu timo da muklone kımdawım dcole u kito bsirutho rabtho du lojistik udu mal. Bebzabno kito şwolo jıddi di bsirutho da maye udu kahrobo udu hulmono u hani kulle camhıdode, mamtelın u camo d’Suriya l’aykanoyutho noşoyto dkıtyo b’qento.

Bebzabno u mşalo Emwothoyo dcali mcadronutho noşoyto Mark Lowcock’ste kali calu qetro da maye dnaqisi ğalabe bu nahro d’Froth mu yarho d’Konun u haroyo uholucdo u şwolano kımşakıl gzomo la haye du camo, da haywotho u dkull mede dkıtyo cayoşo-awkith hol 5.5 milyone dıbnaynoşo masre’ne ba maye du nahro d’Froth uhol 3 milyone’ste kıtte sniqutho l’kahrobo. En dothe a masxore da nahre dmısxori, gıdmıqtıc u kahrobo ba bethkrihe ubğer haqle du bınyono tahtoyo du garbyo udu madınho d’Suriya.