01/05/2022

Qoyumo Tuma Çelik bu yawmo da falohe: latlan mede dxusrina mawxa klosım dımdawmina bu ağuneydan di awyutho u di şawyutho hul dmaydina a zedqeydan

Adyoma dkıtyo ha İyor u yawmo da falohe dıbritho dıqnıfqi la şuqono u kımtalbi b’Zedqe du fulhono tawtır, elo adşato u yawmano mafıt tahte du telolo du qrobo d’Rusya Ukrayan u bhın dukotho thate du caymo du kewo di Corona. Bu yawmano u qoyumo du cameydan Tuma Çelik bi maqırhonutho dıfrısle komır latlan mede dımfaycina mawxa gımdawmina u ağuneydan.

01/05/2022

MERDE/ANKARA — Bu yawmano dkıtyo u yawmo da falohe dıbritho dı maşımci u qolathe u dı tılbi sıttır zedqe u qoyumo du cameydan bu parlemento d’Turkiya Tuma Çelik frısle maqırhonutho bi dafeye du twiter dkımhane u yawmano da falohe emwothoyo. Çelik bi maqırhonutheyde komır ahna latlan mede dxusrina mawxa klosım dımdawmina bu ağuneydan di awyutho u di şawyutho hul dmaydina a zedqeydan u ahna b’idotheyna dımşatsina a hayeydan, u yawmano howe brixo.

Ba athrawotho d’Urifi adyoma a gabe dkıtne semoloye awste mu gabo da falohe kımhadri tagılyotho, elo a tagılyothani ba zabne haroye sıttır mıd howın u tlobo da zedqe da falohe kowın wahde la propogandat da gabe dıksaymilin.

Ba dukothe dkito heş şutose u tahbaryotho da falohe dkıtne qawye kımhadri tagılyotho dıg tılbi a zedqe noşoye u bhın athrawotho ste kowın talabe mşahılfe dımqabıl da diktatoriyat u du maftah hemo.

B’Turkiya adyoma naqa hreto a wahde da dukotho da tagılyotho hawın a dukothe da falohe u da Pwelıs dkothın mqabıl dıhdode b’Stambıl msik ğalabe falohe dıbciwo dızzınwo l’Taksim dkıtyo u whadı idico da tagılyotho dhawo wahdo du qatlo lhın ma falohe.

U ba mdinotho hrene ste cayni hızwone kmahwın aydarbo a Pwelıs ksaymi hboso cala falohe dkıbci maşımci qolaye.