Qoyumto Codişo sımla socurutho lu camaydan da qıryawotho d’Nuhadra

İ mathlonitho du camaydan bu parlamento du qlimo d’Kurdistan du Iraq qoyumto Klara Codişo, u acma ste u waziro dıkhoyır cala sebwotho da came qalile du qlimo, sımlın şişaltho d’socurwotho la mşale u mdabrone da qıryawotho u qastrat du camaydan dkıtne bi hiğmonutho d’Nuhadra bu garbiyo du Iraq.

Ba ytawyotho dsimi cama mşale da qastrat, drişo i aykanoyutho du camaydan wa sniqwotho dkıtle ba qıryawotho d’Nuhadra.

Calu talab dhawila i mathlonitho du camaydan bu parlamento du qlimo d’Kurdistan du Iraq dmisım socurwotho la fenyotho u qıryawotho du camaydan dkıtne bi hiğmonutho d’Nuhadra, i qoyumto Klara Codişo wu waziro dıkhoyır cala sebwotho da came qalile bi şultonutho d’Arbil Aydın Macruf, mabdelın bu şuroyo dkulle socurutho lu qentrun di hiğmonutho d’Nuhadra u mıstaqıbli mu hiğmuno Cali Tatar, ubıthır mathe maftelın fothaye li qastra d’Zawite dıkhıbşo b’gawa arbac qıryawotho du camaydan, u laqın eba u mdabrono hatho di qastra.

Bıthır mi ytawtathe, Codişo u Macruf sımlın socurutho li qastra d’Mankeş u laqın eba u mdabrono hatho di qastra wu kohno di cito d’sohdo Mor Gorgis qaşişo Yoşya. Camgabıdathe, qoyumto Codişo wu waziro Macruf sımlın socurutho li qritho du camaydan d’Aynşak dkıtyo bi qastra d’Alcimadiya, u mıstaqıbli bu salon di cito d’Mort Şmuni mu qaşişo Samir umu qaymaqam.

U nişo da socurwothani dmıkle m’qariwo cali aykanoyutho du camaydan u Kaldoyo Suryoyo Othuroyo, udmitagle cala sniqwotho dkıtle, cala casqıwotho dıkloqlelın bu maşıqlano ducdo, ud’minase dmışrın a’qetre dıkcayşilın ba qıryawothaththe bi hiğmonutho d’Nuhadra.

A’socurwothani knıfli bu taro di tahrazto dımbaynola i şultonutho d’Arbil bi sbutho dmitahwe yasifutho la came qalile du qlimo, bnişo dmınfıq moro li ithuthathe ulu teqwiyo di ciyeşe u şawtofutho bayn da came mşahılfe du qlimo.