Qtil galwoyo hreno me Suriya b’Turkiya

U galwoyo Suri Yusıf Cakş Bala dcımre 36 ışne, qtil m’tre farsufe Turkoye bu hçomo dsımlın acle ba skine bi mditho d’Kayseri bu qlimo d’Anatolya bu mesco dı Turkiya.

Lfuth u tboco froso dı Turkiya, u galwoyo Suri Bala qtil bu mhoyo dımhe b’ale naşıfto b’dukotho frişe du fağrayde m’tre farsufe dlatne idice bi mditho d’Kayseri. U tboco froso mawdacle ste lfuth a’buqore qamoye dsimi, i celtho du mawto u yuqdono dhawi bu baytayde yo. Elo u taşroro du Otopsi makadle di celtho du mawto du galwoyo Suri Bala a’skine dımhın bu fağrayde yo.

Callathe, a’powelıs Turkoye msıklın tre farsufe dcımraye 19 ışne udıkmisım texmin dhınne ne a’qatole d’Bala. Ba hezwone dıgrişi ma kamirat ma sayiryotho dkıtwın bi fnitho, mahwele du galwoyo Suri mawqıd u baytayde bıthır mdıqtilın udıgnulın u talafonayde di ido.

Bıthır mathe, a’powelıs Turkoye ba buqore dsımlın mawdaclın du gawloyo Suri dımqafyo i şladayde bu baytayde dmawqıd, qtil ba skine dımhın ebe m’tre farsufe nuxroye dımnasewolın dgınwi u talafonayde di ido.

Bi harayto du yarho d’Konun u Qadmoyo dşaficina, qtılwo u galwoyo Suri Mahmud Şobek bu buğro dmıhewo b’sadre m’farsufo Turkoyo bi mditho d’Ğazi-Antep bu taymno dı Turkiya.

Ba yarhe haroyani, i kampanya tuhmonoyto mqabıl da galwoye Suriye dkıtne b’Turkiya kul d’athi qaşyo zıd, dilonoyith bıthır mu gunho du qatlo d’claymo Turkoyo bi fnitho d’Altın Dağ bi mditho d’Anqara dıqtılwo m’galwoyo Suri bu yarho d’Ob dşaficina.