Rabhaylawotho Amerikoyo mawdacle latna hol colam fayoşe b’Suriya

Bu zabno dımqarawle u qonuno d’Qaysar dmitafıt la haye, u rişono di mdabronutho qentrunoyto Amerikoyto rabhaylawotho Keneth Mackenzi, makadle du athrayde lıkobıc aminoyith dfoyış b’Suriya, ube bzabno mawdacle d’Waşington latla holucdo tahrazto zabnoyto du groşo da haylawothayda me Suriya.

 Me gabo hreno, Pentagon makadle dkobıc dmaqwe u haylo folhoyo d’Amerika ba fenyotho du garbay madınho d’Suriya.

 U rişono di mdabronutho qentrunoyto d’Amerika rabhaylawotho Keneth Mackenzi, athmıl mıştawtafle lu lumodo dımtayıb bu darbo du video bu inistitut du madınho mescoyo b’Waşington.

Mackenzi bu mamlo dsımle bu lumodano mırle; Amerika lıkıbco aminoyith dfayşo b’Suriya. Lıkdacno mıqa zabno gıdfayşina bu athro. Elo qrihoyo dlıgıdfayşina b’gawe du athrano hul colam. İnaqla dhowe u maşıqlo hadiro, klozım dnufqina me Suriya. Wu medano gıdhowe b’fusqono siyasi. Ahna qadirina dnufqina me Suriya inaqla dşowe u zabno.

Me gabo hreno, i wazirutho du sutoro d’Amerika makadla dımbayanla tahrazyotho leşan dmitaqwiyo i ithutho folhoyto d’Amerika bu garbay madınho d’Suriya, bnişo dmonıc u mede dfayış ma grube marhıbone d’Dacış dlımotın la bire du nafto naqla hreto.

Pentagon mawdacleste d’Waşington kdırşo ucdo aydarbo dmarkıwo mehatho u froso da haylawotho Amerikoye ba fenyotho du garbay madınho d’Suriya, bnişo dmisım u sutoro da bire du nafto.