Raşomo Hanna Alhayek nqil ma hayani

U amnoro Suryoyo mşamho du rşomo Hanna Alhayek, nqil ma hayani bi mditho d’Södertelje bu athro du Swed b’cımro d’79 ışne. Alhayek dhani zabno yarixo dımşalatwo acle u kewo, arşomayde dkımgaşmiwo sebwotho mşahılfe, kmiqaysiwo b’darğo tibeloyo, ube bzabno qayıthwole menyono d’şukone u sohıdwotho xıd iqoro li amnoruthayde bu haqlo du rşomo

U amnoro Suryoyo mşamho du rşomo Hanna Alhayek, mawladwo bi mditho di Hasake b’Suriya, elo yaruwo bi mditho di Qamışli dkıtyo catırto ba mawhabyotho. Qrewole bi bethsawbo dı Darımsuq u ferco da yulfone du filosofi, ucal dıkrohamwo urşomo zıd mu filosofi hawiwo malfono du rşomo ba madraşyotho di mditho di Qamışli, ubıthır mathe mbayanwo mdabrono dhın madraşyotho du maşıqlo mescoyo udu Jimnasyet di hiğmonutho di Hasake, u nqiwole bıthır li erişkoyto dı Darımsuq, ubu athro d’Suriya mtayabwole glohe farsufoye u mkanşe.

Alhayek bi şato da na’1977 mgalwewole lu athro du Swed, u markawole ahayayde bi mditho d’Södertalje. Ubu Swed flıhle xıd malfono du rşomo l’zabno d’30 ışne, ubıthır mathe hule u zabnayde kule lu rşomo.

Alhayek hadomowe bu huyodo da amnore du Swed ud’İskandinavya, u hadomow ste bu huyodo tibeloyo da amnore.

Zıd m’50 methhawyınwotho du rşomo mtayabwole ba salone uba botaycatiqutho du Swed, ub’ğalabe athrawotho d’Urifi, baynothaye Polonya, Danmark, Beljika, Almanya u ğer athrawotho.

Bayn da lohiyotho dkıtle amnoro Alhayek mgaşamşle bhın surotho u qtolğenso du Sayfo da na’1915.

Amnoro Hanna Alhayek ha ma farsufe hfite dkulle we bi golutho bu haqlo di amnorutho udi mardutho. Qayıthwole sohıdwotho du iqoro ba cadcide dmıştawtafwole ebaye. Ube bzabno qayıthwole midali du manoro gawonoyo i şato da na’1983. Ubi şato da 2000 huwwo ele u şukono marduthoyo d’İkolov. Ubıthır mathe qayıthwole ma şutose du camaydan u şukono d’Naccum Fayeq.