Selahattin Demirtaş mdaşın u şukono da zedqe noşoye d’Weimar

U rişono zawgoyo catiqo du gabo Demoqratoyo da Came-HDP Selahattin Demirtaş, mdaşın u şukono da zedqe noşoye d’Weimar.

Demirtaş mdaşın u şukonano, cal dhze xıd ha ma folitiqore ulsoye u rişoye di saqıbloyutho d’Turkiya bu makthabzabnoyo haroyo.

Selahattin Demirtaş dkıtyo heş ma 2016 bu hbuşyo d’Edirne d’Turkiya, mdaşın u şukono d’Weimar Human Rights Award di şato da 2021, cal dımfaşıq xıd ha ma folitiqore ulsoye u rişoye di saqıbloyutho d’Turkiya bu makthabzabnoyo haroyo.

U şukonanoste, gıdmitahwe bu zawho ruşmoyo dgımisım bu yarho d’Konun u qamoyo. Demirtaş dımbare’wo ma thome, mu bethdino da zedqe noşoye d’Urifi, heş bu hbuşyo’yo. U Tukoso Almanoyo da Kenşe dkıtne qumu Qşoco, huwle u tebo dcalu şukonano.

Bu fuşoqo dhiw calu şukonano dgımitahwe l’Demirtaş mawdıc’ste, du mşalo catiqo di HDP mdafacle dıklozım dmiqafe şroyo mşayno lu şwolo da Kurdoye, li sbutho di demoqratoyutho, li hirutho tawdithoyto da Mşihoye, da Calawiye uda Ezidoye.

Bebzabno Demirtaş mdafacle a zedqe di şawyutho du camo Kurdoyo, Suryoyo Othuroyo, Armınoyo u Yawnoyo bıgawe d’Turkiya u acmaye’ste bi sbutho du leşono, di siyase udi mardutho. İ qoyumtho di HDP u fırco d’Adana Meral Danış Beştaş’ste mdaşnowa u şukonano ban 1998.