Sfitho folhoyto du İran ğayiro bu yamo d’Cuman

U gasyo du İran mawdacle di sfitho du qrobo Xark ğayiro ba maye du yamo d’Cuman, bıthır mu yuqdono rabo dhawi eba.

Bu yuqdonano dkıtne a’celothayde ğnize, a’pilote folhoye di sfitho kulle maxılsi u noşo menaye lıqayıthle husrono.

A’fulhone dsimi m’athmıl blalyo udımdawamlın 20 şoce, lımakşarlın bu texliso di sfitho rabtho dkulle du snodo lojestik folhoyo du gayso du İran, bıthır mu yuqdono rabo dhawi eba.

İ fnitho du yamo dı Jask dıknıflo bu tayman madınho dı Tahran, mawdacla di sfitho İranoyto du qrobo Xark ğayiro kulonoyith bu yamo d’Cuman qariwo mu kanal d’Hırmız du Xaliç Caraboyo, wa fulhone du texlisayda azzın lu xalyo. Bebzabno, menyono ma ajanse da tebe du İran, mawdaclın di sfitho Xark ğayiro adyawma l’celotho dkıtne ğnize.

Camgabıdathe, u ajans d’AP mawdacle di sfitho Xark ktıcnowa Holikoptıre du qrobo, ul’zabno d’40 ışne kımqadmowa mcadrınwotho lojestik lu haylo İranoyo du yamo. Bebzabno, u haylo İranoyo du yamo bu buyono dıfrısle, mawdacle da pilote folhoye wa falohe kulle dkıtwın bi sfitho maxılsi u lıçarilın mede, elo u buyono lımathkarle ulo mede cali celtho du yuqdonano dkıtyo hul ucdo ğnizo.

U gedşano dkıtyo ğnizo kmıhşu ha mi şişaltho da gedşe ğnize da hçome dsimiwo mu yarho d’Şbot dşaficina cal sfinotho İranoye u hrene İsarloye. Bu yarho d’Nison dşaficina, u İran mawdacwole dıhçımwo cal hdo ma sfinothayde du qrobo bu yamo Semoqo. Ucali sbuthathe, u froshezwo d’Alcarabiye mawdacwole d’grub İsarloyo du Komandose mahıtwole foquctho magnet bi sfitho da noture qawmonoye du İran udkımmathlowa qentrun du teltimo d’mawdcınwotho da n’istixbarat mqabıl du sforyamo macırboyo du Yeman.

Bi şato da na’1977 u İran şqiwole i sfitho folhoyto d’Xark mu athro dı Britanya, ubi şato da na’1984 Britanya maslamwola i sfithathe lu İran dkıtwe b’aykanoyutho d’qrobo camu athro du Iraq.