Sim knuşyo rwiho bi mditho d’Caynkawa cala şuhlofe demoğrafoye

Bi mditho d’Caynkawa bu garbiyo du Iraq, mtayıb knuşyo rwiho dmıştawtafle mathlone ma gabe u tukose folitiqoye du camaydan u mathlone d’gabe Kurdoye u şutose du kenşo mdinoyo cam menyono d’qoyume u mahire u mşale d’şutose ruşmoye.

Bu huthomo du knuşyano, a’mıştawtfone tlıblın mi şultonutho du qlimo d’Kurdistan du Iraq, dmitakılyo i tarmitho du bnoyo d’bote hathe di şırke d’Lalaf cal dgımşahılfo i demoğrafya di mditho d’Caynkawa.

Bu insiyativ di knuşto d’Mor Coda di zaricutho d’Caynkawa, mtayıb yawme d’Hamşo dşaficina knuşyo rwiho dmıştawtaflele mşale d’şutose ruşmoye, qoyume, mathlone d’gabe u tukose folitiqoye du camaydan u mathlone hrene d’gabe Kurdoye u şutose du kenşo mdinoye u nahire idice bu haqlo kenşoyo du camaydan d’Caynkawa. Bu knuşyano dhadırle mathlono mu gabo du Huyodo d’Bethnahrin Athroyo d’HBA, drişo i sbutho du grofo d’740 Donımat d’arcotho di zaricutho du camaydan dıknıfli bu macırbo d’Caynkawa, bnişo dmıbne ebaye kunoşo d’bote di şırke Kurdoyto d’Lalalf bıthır mıdqayıthla fsoso mi sictho da tarmiyotho du qlimo d’Kurdistan. An’arcothani masılmi li şırke d’Lalaf dlo murajaca li karxutho d’Caynkawa udlo ste myodo du hşowo la qonune dilonoye dkıtne masre cama zedqe da came qalile du qlimo, ubebzabno i tarmitho da bote d’Lalaf kımmathlo dyoşo lo qunono da hamşo di şato da 2005 dmawfaqwole u parlamento du qlimo d’Kurdistan.

Lfuth i maqırhonutho dıfrısla i knuşto d’Mor Coda di zaricutho, a’mıştawtfone lu knuşyano tlıblın mi şultonutho d’Arbil dmitakılyo i tarmithathe dıkmıhşowo şuhlofo demoğrafoyo l’Caynkawa, u gıdhuyo celtho la generasyone du camaydan dlıqathlın bu dactid falqo d’arco d’bayto, udothe ste i tarmithathe dmitafito la haye, gıdtıfko i claymuthaydan li golutho mu athro. A’mıştawtfone mawdaclın ste dkımaydi i egartho dımşadrowa 28 bu yarho d’Nison dşaficina la tloth rişınwotho du qlimo, udıktılbo dmitakle u kboşo da n’arcotho du camaydan u dmitadcıri la thume di karxutho d’Caynkawa. Bebzabno, a’mıştawtfone tlıblın dmisım knuşyo cami rişwazirutho du qlimo, bnişo dmıdroşo i sbuthathe bırwihutho.

Bu huthomo du knuşyano, a’mıştawtfone makadlın dgımdawmi dımcaqbi a’tedbire qonunoye bi sbutho da n’arcotho d’Caynkawa, ham bu darbo da şutose ruşmoye di şultonutho u hamıste bu darbo da tagılyotho mşayne du protesto. Camgabıdathe, a’mıştawtfone fsıqlın dımtaybi knuşyo hreno 10 bu yarho d’Hzirın dıbqamuthayna, laşan dımcaqbi a’şuşote haroye dgıdhowın bi sbuthathe da n’arcotho.