Sim tagliyotho bu yowmo şatonoyo da tagliyotho du Iraq

Ba tagılyotho dımtaybi bu yawmo şatonoyo du zawco camonoyo du protesto bu Iraq, hawi taxtuşe u qale bayn da mtagılyone d’Boğdod wa haylawotho di mşaynutho.

 Camgabıdathe, i şultonutho du Iraq mawdacla dmatila mawdconutho dıkmagılyo cali hiyoyutho du grub da qatole du mbahnono Iraqoyo Hişam Alhaşimi.

 37 mdinoye u 14 rabayhaylawotho mjarhi ba taxtuşe u bi qale dnafiqo athmıl bayn da haylawotho di mşaynutho wa mtagılyone d’Boğdod dnafiqi la zabuqone bi cohnutho du yawmo şatonoyo qadmoyo du zawco camonoyo du protesto dımşarewole bu yarho dı Teşrin u Qadmoyo i şato da 2019.

Lfuth mabuco di mşaynutho, i sagiyutho da mdinoye mjarhi bi netije da hatrotho dmıstacmelın ahaylawotho di mşaynutho mqabıl da mtagılyone, wi sagiyutho da folhe di mşaynutho mjarhi bi netije da kefe dımhalaqlın aclaye amtagılyone.

U malolo du rişono gawonoyo da haylawotho du Iraq Yahya Rasul, mawdacle dkito grub mbayn da mtagılyone mhalaqle foqucwotho di ido cala haylawotho di mşaynutho bı Boğdod, u bi netije du hjomano mjarıh tıre rabayhaylawotho u 30 folhe ma hadome du grub trayono di aykanoyutho şnizto. Rasul mawdacleste da haylawotho di mşaynutho nafiqi moro la mtagılyone lfuth a fuqdone dımbayni mi şultonutho.

Bıthır ma tagılyothani dımtaybi bi erişkoyto du Iraq u teşco hiğmınwotho bu taymno du athro, u rişwazire Mustafa Alkazimi bu mamlo dsımle adyawma, mawdacle da tagılyotho du protesto dsimi athmıl hulın hergo lkul noşo, u mırle “a’tagılyothani duxrono mşaynowın la gedşe dı Teşrin u Qadmoyo”. Alkazimi mawdacleste da mtagılyone mathbatlın i mothonoyuthathe wi masiruthathe cama fusqone.

600 mtagılyone qtiliwo u 30 alfo mjarhiwo u ba mowat hrene msikiwo ba tagılyotho du protesto dımşarewolın i şato dşaficina u dımdawamwolın hul dımnaqewo Alkazimi rişwazire hatho li şultonutho du Iraq.

Mxasra hreto, u malolo du rişwazire Ahmad Talal bi maqıblonutho dsimo acme bu froshezwo d’Alhadath, mawdacle da buqore dsimi bi sbutho du qatlo du mbahnono Iraqoyo Hişam Alhaşimi matın li hiyoyutho da qatolayde. Adyawma bıthır mıdşafıc arbıco yarhe calu suikast du qatlo d’Alhaşimi, u malolo d’Alkazimi mawdacle dlıkowe dmagle cali hiyoyutho da qatole laşan dmınfıq moro li ğnizutho da buqore.