Sim tahrazto b’Suroyo TV cali sbutho da thome lo şarire cal qoyumo Tuma Çelik

Bi tahrazto dhawyo athmıl b’Suroyotv cali sbutho du qoyumo du cameydan u Suryoyo Tuma Çelik nafıq li holo, dsim komplo calu camo Suryoyo bi şaxsiye du qoyumo.

 Ba mamle dhawın ma dayfe dkıtweyne u qoyumo d’Tuma Çelik wu hadomo di mdabronutho du mawtbo umthoyo d’Bethnahrin Lahdo Hobel sımlın qrayto lu cameydan dmınfıq mqabıl da hjome dkowın me Turkiya calu cameydan.

I tahraztathe athyo lu hwoyo, bıthır mu hjomo dhawi calu qoyumo du cameydan bu parlemento d’Turkiya Tuma Çelik, dıthim b’sbutho dmowfqowale u qoyumo lu xalyo bi maqırhonutho dıfrıswole.

Bi tahrazto i mawdconutho dhule u qoyumo du camo Suryoyo, mahkele bı rwihutho cala teştıcınye wu kumplo dmabdela i şultonutho d’Turkiya mqabıl du camo Suryoyo dımşarele me zabno yarixo.

Çelik bu mamleyde mırle, Bi sbuthathe kula, abici dmıskili yasiro elo  lo makşarlın ubi hamle da tarteste lıgmakışri. Ono harkeno b’Turkiya u gıdfaşno harke, metul du ağuno du cameydi layıqyo dfaşno harke leşan du cameydi dmote la nişe dkıtle.

Me gabo hreno u mathlono du Mawtbo Uumthoyo d’Bethnahrin Lahdo Hobel mahkele bırwihutho, d’Turkiya mın kıbco u mın tahrazto kıtla mqabıl du cameydan mawxa ulsoyoyo ğalabe, d’ahna xıd camo dı qudrina dımhaydina u hayleydan mqabıl da hjome dkowın aclayna.