Sim u futoho du qentrun d’qadişo Mor Cabdişoc di cito d’Madınho d’Othuroye bi mditho d’Melborn

 Bi mditho d’Melborn bu athro d’Australya, sim u futoho du qentrun d’qadişo Mor Cabdişoc di cito d’Madınho d’Othuroye.

 U qentrunano dıkmişakıl m’salon u menyono d’qeloyotho, gıdmitahwe ebe u yulfono di haymonutho Mşihoyto, u gıdmitahrıg ste ebe u leşono Suryoyo emhoyo.

 I marcitho d’Australya di cito d’Madınho d’Othuroye, sımla ba yawme dşaficina u futoho du qentrun d’qadişo Mor Cabdişoc bi fnitho d’Kolaro bi mditho d’Melborn.

U zawho du futoho mrayşanle u wakilo fatıryarxoyo da marciyotho d’Australya, dı Newziland ud’Lebnon hasyo Mor Melis Zayya, u mıştawtaflele u efesqufo du qlimo d’Viktorya Mor Bınyamen Eliya u menyono celoyo d’mşale d’şutose, qoyume, rişone d’gabe u karxıwotho u mathlone d’şutose kenşoye u marduthoye du qlimo d’Viktorya, uba mowat du camaydan di mditho d’Melborn.

U qentrun hatho d’qadişo Mor Cabdişoc dıkmişakıl m’salon um’şeth qeloyotho, tarmithoyo dkıtla u nişo dmi’amın wahdo marduthoyo u kenşoyo li claymutho, la sobe, la neşe ula grube hrene du kenşo Othuroyo d’Melborn.

Bebzabno, u qentrun d’Mor Cabdişoc gıdhowe i nuqazto aminoyto di madraşto d’Mor Gewargis du tewlifo du leşono Suryoyo u dkiba 170 yolufe u yolufyotho, u gıdhowe ste nuqazto li sictho di claymutho udu yulfono Mşihoyo.