07/09/2020

Taşdarto Rusoyto sımla socurutho li mditho dı Darımsuq

Taşdarto Rusoyto rabtho b’darğo celoyo sımla athmıl socurutho li mditho dı Darımsuq, u yatiwo adyawma camu rişathro d’Suriya Başar Al Asad.

Lfuth u tboco froso d’Suriya, atre gabe drışlın i şişaltho da qyome dımdanwo baynothaye, elo lfuth mabuce du diplomasi Rusoye, bi ytawtathe drişo i hzayto kamılto dkıtla Rusya lu maşıqlo folitiqoyo hatho d’Suriya.

U rişathro d’Suriya Başar Al Asad, mıstaqbele adyawma bı Darımsuq taşdarto rabtho me Rusya bi rişonutho du waziro di baroyutho Sergey Lavrov.

Al Asad bi ytawtathe mawdacle di şultonuthayde b’fusqono kamiloyo dımdawmo dfulho cama Rusoye, bnişo dmitafiti la haye aqyome dımdınwo bayn Mosko u Darmsuq, baynothaye atarmiyotho momunoye dgıdsaymolın Rusya bu athro d’Suriya. Al Asad mırleste “matina l’awyutho cama Rusoye, dımdawmina camıhdode lafqıdam, bnişo dımşarırina aqyome momunoye”.

Megabo hreno, Lavrov bi maqırhonutho dhule mawdacle du nişo di socuruthathe dmıdroşi anesore cam Suriya bu taro da şuşote hathe, u grışleste u zuhoro cal Suriya dqadiro d’zuxyo cali marıhbonutho bu snodo d’Rusya. Lavrov mırleste “kito bi tahraztaydan sebwotho rişoye hathe, baynothaye u bnoyo d’Suriya me hatho”.

Camgabıdathe, u waziro di baroyutho d’Suriya Walid Almucalem bu knuşyo mşawtıfo dsımle lu tboco froso camu baramnayde d’Rusya, mawdacle da droşe dhawın bi ytawtathe şafici ma şıkılat mşahılfe di methcadronutho cam Rusya.

Elo lfuth i maqırhonutho dhulın mabuce hrene Rusoye li sfaryawmo d’Alşarq Al’awsat, i taşdarto Rusoyto nqila lu rişathro Al Asad i hzayto kamılto dkıtla lu şroyo folitiqoyo d’Suriya, la hıdriyat da guboye u lu şuhlofo du nomuso esonoyo du athro.

Bi maqırhonutho dhule u diplomasi Rusoyo, makadleste di socuruthathe frıştoyo ma socurwotho hrene dsımwolın a’Rusoye lu athro d’Suriya, cal dkito fusqono mu kenşo emwothoyo dmitabde u maşıqlo da mcadronwotho momunoye d’Suriya, mqabıl du nqolo lu maşıqlo folitiqoyo hatho d’Suriya.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…