Turkiya kımdawmo dmowqıdo anarcotho du cameydan

Me gabo hreno, a hayle kaboşe d’Turkiya wa marhıbone noqufayda heş kımdawmi dhowın celtho la yuqdone dkowe ban arcotho di zaricutho bu garbay madınho d’Suriya.

 Camgabe d’Suriya, ba şabe haroyani nafıqste ğalabe yuqdone bu garbyo du Iraq. Mawdıc bi netije da taxtuşe dhawın beyn du gayso Turkoyo udu gerilla di PKK b’Zaxo, yaqıd 25 dönumat d’arcotho.

U gayso kaboşo d’Turkiya wa marhıbonayde d’Suriya, kımdawmi dmawqıdi anarcotho di zaricutho du garbyo d’Suriya. A folhe Turkoye wa marhıbone, mawqadlın anarcotho di zaricutho di qritho d’Qasimiyah b’Tel Temır.

U yuqdonano mşarewole athmıl meqım me falge d’yawmo u mbarbız bı surhobo lğer arcotho mcal fothe di hawa dkıtwo. Mu şuroyo du yarho d’İyor dı şafıcina uholucdo, mawqıd ğalabe arcotho du qlimo bu taro du qrobo dıkmaşyo Turkiya bu garbyo ubu madınho d’Suriya xıd metod sistematik du qşoco da came.

Elo lo belhude b’Suriya, bu zabno haroyano bu garbyo du Iraqste fayış kmitawqıdi anarcotho da mdinoye. Lfuth mşalo d’Nuhadra, mcal fothe da taxtuşe dkımdawmi beyn d’Turkiya udu gerilla di PKK, yaqıd athmıl hol 25 dönumat d’arcotho di zaricutho.

A folhe Turkoye dcabiri la dukotho du turo d’Xamtire b’Zaxo, kımnasın dmatimi u gerilla di PKK wa cuqobani kobın husrono rabo la mdinoye ula mulkonathe wan arcotho di zaricutho, kmitawqıdi kulonoyith.