Turkiya kımşatso nuqazto folhoyto b’Rişcayno

U şutoso d’İzdina mawdacle du gayso kaboşo d’Turkiya shıfle u grıfle menyono celoyo d’bote da mdinoye u kbışle anarcothathe bu garbay madınho d’Suriya.

U şutoso d’İzdina lfuth a surotho dıgrışle, mawdacle d’Turkiya kımşatso nuqazto folhoyto hathto hedor di mditho d’Rişcayno.

I dafo du şutoso d’İzdina mawdacla du gayso kaboşo dı Turkiya mşarele dbone nuqazto folhoyto bi qritho d’Aldaodiya hedor di mditho d’Rişcayno bu garbay madınho d’Suriya. U şutoso d’İzdina mawdacleste dı Turkiya kmınco amdinoye dıdıcri la botathe uktıhmolın dkıtne noqufe la haylawotho d’Suriya demoqratoyto d’QASAD.

U grub du şutoso d’İzdina laqi menyono ma yaqrotho di qritho d’Aldaodiya dımakadlın da haylawotho Turkoye lıtrelın meqım hedor tıre yarhe dımcafın ha ma comure di qritho, bi celtho dkıtyo iqfitho dnitho folhoyto.

U grub du duyoqo d’İzdina lfuth asurotho dıgrışle, makadle d’30 mbayn da 200 bote dkito bi qritho d’Aldaodiya shifi ma haylawotho kaboşe dı Turkiya, u’grifi anarcotho dkıtne cayıd d’10 yaqrotho. Izdina makadleste dımqayadle anışmone da farsufe kulle dqayıthlın husrono.

Camgabıdathe, u şutoso d’İzdina mawdacle da haylawotho Turkoye dıgrıflın arcotho rabe di zaricutho, maqımleste şuro rabo hedor di nuqazto folhoyto dıkmıbnoyo ucdo bu garbay madınho di qritho d’Aldaodiya. Bi nuqaztathe mahıt burge du duyoqo, radare, qentrun du tefiro da tayisyotho dılo pilot u ğer alat folhoye.

Meqım mathe, Turkiya mşataswola nuqazyotho folhoye hedor di mditho d’Rişcayno udı Tel Abyad bıthır mdıkbışwola i fnitho bu yarho dı Tışrin u Qadmoyo i şato dşaficina.