Turkiya mhadadla dıgseymo hjomo folhoyo cal İdlıb

Rusya thımla Turkiya dlımafıtla la haye a’qyome dkito bi sbutho d’İdlıb, u mawdaclaste di aykanoyutho di fnithathe layba dmitadcıro li aykanoyuthayda dmeqım.

 M’gabo hreno, Turkiya gzımla dgıdsaymo hjomo folhoyo hatho b’İdlıb, ida dlımgroşi a’haylawotho du rejim d’Suriya mhın fenyotho dmahıtla ido aclaye b’İdlıb.

 U waziro di baroyutho d’Rusya Sergey Lavrov, bi maqırhonutho dhule adyawma mawdacle da droşe dhawın bayn d’Rusya u Turkiya bı Mosko cali aykanoyutho d’İdlıb lımmatın l’netiçe, u matcanle Turkiya i mşalutho dlımte l’şroyo bi sbutho d’İdlıb.

Be bzabno, Lavrov mawdacle dı Turkiya lımakşarla dmafito la haye a’fusqone du qyomo d’Soçi dımdewo bayn du rişqutno d’Rusya Vilademir Putin wu baramnayde dı Turkiya Receb Tayip Erdoğan i şato da 2018. Lfuth u qyomo d’Soçi Turkiya klozım dfırşo bayn da saqıbloye wa marıhbone b’İdlıb bu taro d’zabno mhadıdo, mawxaste Lavrov mırle “Mosko lıktılbo m’Anqara dsaymo mede zıd mu mede dımtewo acle l’awyutho b’Soçi. U qyomo bayn Rusya u Turkiya lıfsıqle dmitagıldo i aykanyutho b’İdlıb, udmitahwe hirutho la marıhbone dsaymi u mede dkıbcile tamo. Ube bzabno noşo lule wacdo dlımigış ba marıhbone b’İdlıb”.

Camgabıdathe, Lavrov mawdacle dlaybe ucdo dmıdrış dmitadcıro i aykanoyutho d’İdlıb li aykanoyuthayda dmeqım şato u falge, dilonoyith bıthır mıdmahıtlın a’haylawotho di şultonutho d’Suriya ido cal fenyotho rabe b’İdlıb, baynothaye a’tre darbone stratijikoye d’M4 u M5. Lavrov mathkarleste da hçome dıksamlın u gayso d’Suriya funoyone la hçome dıksaymilın a’marıhbone d’İdlıb cali nuqazto Rusoyto dı Hmemim, cala mdinoye ucala haylawotho d’Suriya, u mawxaste Rusya ksındole ba hçomani.

M’gabo hreno, u rişqutno dı Turkiya Erdoğan mawdacle dlatne radye cali netiçe da droşe dıkamili athmıl bı Mosko, ube bzabno gzımle dgıdsoyım hçomo folhoyo hatho b’İdlıb, ida dlımıgroşi a’haylawotho du rejim d’Suriya mhın fenyotho huli harayto du yarhano, u mırle “hano u zuhoraydan u haroyoyo, wu hçomo cal İdlıb hawi hamico, ukıbcina dımşahılfina İdlıb l’fnitho mşayanto”.

Mxasra hreto, ba casrowat d’yaqrotho nafiqi ma fenyotho dkıtne bi morutho da marıhbone, u şafici mu darbo noşoyo dıftıhle u gayso d’Suriya bu macırbo di mditho di Macrtho d’Alnucman b’İdlıb. Bnişo dkolın cali aykanoyutho da botaththe bıthır mıdfayıt u duyoqo di mditho li şultonutho dı Darımsuq.