Turkiya sımla hçome oyaroye cali maşritho d’Maxmur bu garbyo du Iraq

İ maşritho d’Maxmur bu garbyo du Iraq, mido nişo lıhçome ma tayosyotho d’Turkiya. Ba hçomani dsimi xlıqlın zuctho beyn da comure, elo noşo lo qtil ulo mçarıh.

Me gabo hreno, a Haylawotho du sutoro da Came-HPG frısla maqırhonutho u makadla, dqtila 10 folhe Turkoye ba cuqobe dsımla aclaye bu garbyo du Iraq.

Lfuth i mawdconutho dhiwo mi maşritho da Kurdoye b’Maxmur du garbyo du Cıraq, athmıl ba şoce d’safrayto mhelın tayosyotho Turkoye dlo pilote cali maşritho. Bu hçomano hiw belhude husrono maddi elo xlıqleste zuctho beyn da comure. Hathe latyo inaqla qamayto da hayle kaboşe d’Turkiya kımohın bi maşrithathe.

A hçomani d’Turkiya kmisomi calu garbyo du Iraq, cal asas dmıhyo dharbo lu gerilla di PKK umcal fothe da hçomani’ste ba mowat d’qıryawotho du qlimano maxlın ma comure. U rişono zawgoyo du Mawtbo da Came d’Maxmur Haji Kagan bqaşyutho krıhle u hçomano d’Turkiya u mırle; Ahna ba haye lıkmaslımina ruhayna cala hçomani dıkmisomi cal Maxmur, dkıtne dewam du qtolcamo dıksaymo Turkiya cala Kurdoye.

Turkiya camgabe da hçomani dsımle cal Maxmur, sımla’ste cuqobe frişe cal Şigor, cal dukotho frişe du garbay madınho d’Suriya. Bebzabno a Mharbone di HPG bi maqırhonutho dfrıslın m’akadlın, dqtilın 10 folhe Turkoye ba 2 cuqobe haroye dsımlın aclaye bu garbyo du Iraq. Beyn da folhe qtiloye, kıtwo’ste 2 mşale du gayso.

Camgabe da cuqobe uda taxtuşe dıkmdawmi beyn Turkiya udi PKK bu garbyo du Iraq, a hayle di peşmerge maglelın cala buhone dsımlın cala hçome dsımlın a ğrobe marhıbone d’Dacış. Lfuth a buhonani di peşmerge, bıgawe d’zabno d’4 eşne sımlın a marhıbone 4.887 hçome b’dukotho frişe du qlimo d’Kerxeslox.