Turkiya sımla hjome hathe calu garbyo du Iraq

A tayosyotho du qrobo d’Turkiya, sımlın athmıl casriye cuqobe oyaroye hathe cal dukotho frişe dkıtne qariwe li mditho d’Zaxo bu garbyo du Iraq.

 Cala hjomani du gayso kaboşo d’Turkiya, kfix naqla hreto u camo d’Şiladıze u Nuhadra la zabuqone u sımlın protesto Turkiya. Bu zabno da tagliyothaniste nafıq taxtuşe dhawın celtho dmijarıh kımo mdinoye.

Athmıl ba şoce du lalyo, sımlın naqla hreto a tayosyotho d’Turkiya cuqobe cala qıryawotho d’Yusuf Ağa u Bersfey dkıtne qariwe li mditho d’Zaxo bu garbiyo du Iraq. Cala hjomani a hathe dsımla Turkiya calu qlimo xliq zuctho beyn da comure, elo lo hiw mawdconutho en qtil mdinoye u loste calu husrono dhawi.

Bıthır ma hjomani dmabdewola Turkiya u İran yawme dıtre dı şafıcina calu gerila di PKK bu garbyo du Iraq, mdawamlın a cuqobani yawmoyith u yawme d’Arbco qtılwo farsufe u yawme dıcrutoste qtılwo 4 hrene. A cuqobani, hawınste celtho dnofıq yuqdone ban arcotho da hete da akore.

Cala hjomani da hayle kaboşe d’Turkiyaste, ba mowat dımtagliyone kfixi athmıl la zabuqone b’Şiladıze ubı Nuhadra u krıhlın u qedomo qaşyo d’Turkiya u simste qroyto hem l’Ankara u hemste li PKK, dnuqli u qrobathe dıkmdawım hani dore yarixe, l’ğer dukotho.

Elo ba tagliyothaniste, nafıq taxtuşe beyn du camo udu polis bu zabno dabici a mtagliyone dızzın l’nuqazto du duyoqo d’Turkiya dkıtyo b’Şiladıze. U polis lo trele da mtagliyone dımdawmi u calathe qayithi bıhdode wu polis mıstacmele ğaz da damce mqabıl dıthe. Bi netiçe 2 mtagliyone u 4 powelıs mçarhi u nqili la bethkrihe.