U athro du Mısır u d’Armenya matın l’awyutho mqabıl Turkiya

Mısır u Armenya matın l’awyutho dmancımi u dawro dıkmıştacın a’hayle baroye bi sbutho du kriz d’Libya u d’Suriya.

 Camgabıdathe, Rusya u Mısır matın l’awyutho dıklozım dmışrın agrube mzayne kulle d’Libya, u dmitawfıqi ahaylawotho nuxroye mu athrano.

 U rişqutno d’Mısır Cabdılfattah Alsisi mıstaqbele athmıl bi mditho d’Alqahira, u waziro di baroyutho d’Armenya Zohrab Manatsakınyan, u drışlın atre bi ytawtathe i aykanoyutho harayto d’Libya u d’Suriya.

Lfuth u malolo di rişqutnutho d’Mısır, atre gabe hulın a hzayothathe cala krize dkito ucdo bu qlimo du madınho mescoyo, baynothaye a şuşote haroye dkowın b’Libya u b’Suriya, b’Lebnon u bı Fleşt. Ubi netije atre gabe matın l’awyutho cali ulsoyutho dmitanqıso i mudaxala da hayle baroye ba nathrawotho du qlimo, cal da haylani kıtlın u nişo dqathlın yuthrone manfacat dilonoye calu hşowo di mşaynutho, di şalyutho u da timoyotho da came di fnitho.

Bebzabno, u rişqutno d’Mısır wu waziro di baroyutho d’Armenya, matın l’awyutho dmaqwın i tagorutho bayn da tıre athrawotho, dilonoyith bu haqlo du hulmono, du yulfono u du turism.

Megabo hreno, u waziro di baroyutho d’Mısır Sameh Şukri wu baramnayde d’Rusya Sergey Lavrov, ba nesore dhawilın camıhdode bu darbo du talafon, drışlın i aykanoyutho d’Libya u d’Suriya wu teqwiyo di methcadronutho mşawtafto bayn da tıre athrawotho.

Bi sbutho d’Libya, Şukri makadle i ulsoyutho dmitaklın ataxtuşe, u dmımte lıqyomo d’şalyuthzayno kamilo u ruşmoyo. Ubebzabno makadle dıklozım dmışrın agrube mzayne kulle udmitawfıqi ahaylawotho nuxroye ma narcotho d’Libya.

U bi sbutho d’Suriya, Lavrov u Şukri makadlın dıklozım dmihalıq dawse bu haqlo da bazare folitiqoye, bnişo dmımte lı şroyo kamilo lu kriz d’Suriya calu asas da fusqone d’Emwotho Mhaydotho dıknıfqi moro li hdoyutho d’Suriya uli şaryuthayda.