U athro du Swed hawi ha ma nathrawotho qamoye dkit ebe hçome zaynoye

U Swed dkıtwe meqım ha man athrawotho haroye d’Urifi dkıtwo ebe hçome zaynoye, adyawma hawi ha ma qamoye. 

Lfuth a buhone dsımle u Mawtbo du Swed dıkfolıh mqabıl da hawbe, mi şato da 2000 uholucdo, zayıd u mınyono da farsufe dıkmıqtoli ba zayne bu Swed. Bu şıkılano, kothe ucdo u Swed bi rişonutho dan athrawotho d’Urifi.

Belhude meqım kmo yawme’we, dqtılwo ha man abne du camaydan bi şawtho d’Geneta d’Södertelje du Swed. Ninos Minason dkıtwe babo d’4 nacime, qtılwo yawme d’Tre dşafıcina ba buğre daxiwole b’guşme. İ sbuthathe dgrışwola u zuhoro du tbocofroso qlimoyo, hawyo’ste celtho dmıxlıq zuctho ba lebawotho da comre di mdito u dıkzayci cala haye da nacimathe.

U qatlo du Ninos, belhude ha mi şişaltho da qatle barbroye dkowın ba zayne bu athro du Swed’yo. Brottsförebyggande rådet-awkith u Mawtbo dıkfolıh mqabıl da hawbe frısle i netiçe da buhone dsımle cal 22 athrawotho Urifioye.

Wu lfuth i mawdconutho dfrısla i mbahnonitho Klara Hradilova Selin; U Swed kothe bi qamayto d’Urifi ba qatle dkowın ba hçome zaynoye. Bebzabno u Mawtbo mawdıc, b’qrihutho kımahwe d’zayidi a hçomani bu Swed zıttır man athrawotho hrene d’Urifi. A hçomani da zayne dkıtyo i netiçathe qatlo zayidi mi şato da 2018, elo ğer hçome dkowın celtho l’qatlo, naqisi.

Bu zabno dıknuqsi a hçomani ban athrawotho d’Urifi, kızayidi bu Swed u belhude Kroatia kıtla mınyono ışmo cleytır mu Swed-dkıtwa bu şuroyo da 2000 bi harayto di lohithathe. Awkith, u Swed şafıc an athrawotho hrene d’Skandinavia u hatta Beljika u Austoria.