06/02/2021

U Bethdino d’Den Haag mabdele buhone cala camle d’İsroyel b’Ğazza

A dayone du bethdino Emwothoyo da hawbe dkıtyo b’Hollanda, ftıhle darbo dmitabde buhone, en a camle d’İsroyel b’Ğazza, b’Dıffa i Macırboyto ubu madınho d’Urışlem kcubri bu taro da hawbe.

 Amşale da Fleştoye bıfsihutho mıstaqbelın u fusqonano d’Den Haag, elo a İsarloye krıhlın u mawdaclın, dhano qedomo folitiqoyoyo wu bethdino latle hawxa zedqo.

Hem İsroyel u hemste u tukoso Fleştoyo d’Hamas, kibe dmisım buhone aclaye bi sbutho da hawbe du qrobo. U bethdino Emwothoyo da hawbe-İCC dkıtyo b’Den Haag d’Hollanda mıdle fusqono, dmawrıx u taro di mşaluthayde dcala dukotho da Fleştoye-awkith u Xtuto d’Ğazza, Dıffa i Macırboyto udu madınho d’Urışlem.

U fusqonano du bethdino Emwothoyo, kıfotıh qum du darbo dmitabde buhone cala thome dsim hawbe du qrobo bi fnitho. Bu şuroyo drışwo, mıqa u bethdino dkıtle zedqo dmoyıd u şwolano li ido wu qetro dkibe dmıxlıq cam İsroyel-dlatyo hadımto bu bethdinano d’Den Haag.

İ mqimathdino d’İCC Fatou Bensouda mawdacle d’drışlın u qetrano me qariwo u bıthır mıd a Fleştoye hadome’ne bu bethdinano heş ma 2015, mid fusqono dmitawrıxo i mşaluthayde, bnişo dmitabde buhone cala mkone da hawbe du qrobo. Bensouda heş ma 2019 mawdacwola dsim hawbe du qrobo ba dukotho da Fleştoye-hem ma hayle du sutoro d’İsroyel u hemste ma ğrobe da Fleştoye-xıd Hamas.

U fusqonanoste xlıqle hfuxye msimone beyn da Fleştoye elo b’İsroyel u rişwazire Benyamen Netanyahu b’qaşyutho krıhle u mırle; A buhonani d’İCC cal İsroyel cal idicat d’hawbe du qrobo dlatne şroro-qedomo mqabıl du semitism’yo da Yudoye’yo. Ahna kobina ağono mqabıl di marhıbonutho udi diktatoriye du İran u d’Suriya.

Camatheste u malolo di wazirutho di baroyutho d’Amerika Ned Price frısle egartho bi dafayde du Twitter u mawdacle, d’Amerika kırufdo u fusqonano du bethdino u gıdfayşo masırto b’İsroyel ubi mşaynuthayda. Amerika’ste latyo hadımto bu bethdinano d’Den Haag. Me gabo hreno i sagiyoyutho da hadome du senato d’Amerika m’ayadlın, dfayşo i rişizgaduthathe b’Urışlem. İ netiçe du quwolano dsim bu Senato kımaglıyo, dlo u gabo qutnuthoyo u loste a demoqratoye kubci dımşahlıfi u fusqono di şultonutho catıqto d’Donald Trump.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…