U camydan u Kaldoyo mcayadle a Oşacne b’Suriya, bu Ciraq ub’Kanada

An abne di marcitho d’Mor Çırçıs di cito Kaldoyto d’Derik b’Suriya, mcayadlın yawme d’Huşabo u cedo da Oşacne lfuth u surgodo hatho. Ba mowat dımhaymne dıkfixi li cito, tcınlın bidothaye şemce u tarfe da zaytune, ubıthır mıd kamıl u tekso ruhonoyo di slutho, a mhaymne mhalaxle bu zabuqo rişoyo dkıtyo qum di cito xıd remzo du cboro d’Moran Yeşuc Mşiho lu hayklo qadişo di mdito d’Urışlem.

Şamoşo Rajif Şamcun mahkele cala remze du cedo da Oşacne u mhanele britho kula bi cohnutho du yawmano dkıtyo u yawmo du hubo udu şlomo. Ubu huthomo du zawho, mfarqo i halyutho cala mhaymne kulle di cito.

Camathe u camaydan u  Kaldoyo dıkhoye bi daşto d’Ninwe bu garbiyo du Ciraq, b’fsihutho mcayadle u yawmo da Oşacne dilonoyith ba qastra d’Karamles, Alqoş u Telesqof.

U mede dilonoyo dgrışle u zuhoro ba zawhani, du camaydan-a gabre, neşe u nacime dlwışlın lbuşe marduthoye ud’mırlın qole citonoye cam musiqi dımqadmo ma gude da boduqe. Camgabe da slawotho dımtaybi ba fenyotho di daşto, sim’ste dawrat da Oşacne dmıştawtaflelın menyono celoyo d’nacime, hsayo u kohne, şamoşe, dayroyotho uba mowat du camaydan di cito Kaldoyto dtcınlın bidothaye slibe, surotho u tarfe da zaytune.

U b’Ontario d’Kanada’ste an abne di marcitho Kaldoyto d’Mor Yusuf mcayadlın u cedo da Oşacne b’qerowo Alohoyo rabo dmıştawtaflele ba mowat d’camo bıthır mi qticutho dhawyowa 2 eşne mi celtho di Corona. İ slutho du qerowo simo bi rişonutho du kohno di marcitho xuroyo Bıtrıs Solaqa ubi methcadronutho da şamoşe udi gudo du koral d’Mor Yusıf. Elo a nacime du yulfono Mşihoyo bu zawho dsim, tcınlın bidothaye şemce u tarfe da zaytune, u mazcaqlın u mırlın “Oşacna lu abro d’Dawid”.