U Ciraq ğimitasrıh menyono zıd mu camaydan xıd powelıs gawoye bi hiğmonutho d’Ninwe
U rişwazire du Ciraq Muhammad Şiyac Alsudani, hule amro dmitasrıh menyono zıd mu camaydan xıd powelıs gawoye bi hiğmonutho d’Ninwe, bnişo dmitaqwiyo i şalyutho bi daşto d’Ninwe, udmınfıq moro li şkihutho Mşihoyto bu Ciraq.
BOĞDOD, CIRAQ – U malolo du rişono gawonoyo da haylawotho folhoye du Ciraq Sabah Alnucman, bu buyono dıfrısle lu tboco froso, mawdacle du rişono gawonoyo da haylawotho folhoye rişwazire Muhammad Şiyac Alsudani, hule amro dmitasrıh menyono zıd mu camaydan xıd powelıs gawoye bi hiğmonutho d’Ninwe.
Lfuth u buyono dıfris, u amro dhule Alsudani athi luhwoyo bu taro da fulhone dıksaymolın i şultonutho du Ciraq, bnişo dmitaqwiyo i mşaynutho wi şalyutho ba fenyotho kulle du Ciraq baynothaye i fnitho di daşto d’Ninwe, udmifıt lu maşıqlo du bnoyo u hethotho di hiğmonutho d’Ninwe.
U buyono mawdacle ste di dawsathe athyo luhwoyo xıd dewam du teqbilo da Mşihoye ba tarte ışne dşaficina bi bethsawbo da powelıs, ubu bethsefro celoyo di şuşoto di mdabronutho udi amnutho, ubu bethsefro da duroşe da neşe.
Bebzabno, u buyono mawdacle du fusqonano kımgaşım u mabco dkıtla i şultonutho du Ciraq dmitaqwın an’esore bayn da came gawoye d’Ninwe wa şutose di mşaynutho, udmınfıq moro li şkihutho Mşihoyto bu Ciraq.
Bu huthomo du buyono, mathkır ste du fusqono dmıdle Alsudani, kşowe lu nfoqo du moro li şkihutho Kaldoyto Othuroyto Suryoyto bi daşto d’Ninwe dkıtyo catırto bi mlahmonutho di yortutho marduthoyto u kenşoyto.