U gayso d’Turkiya cabır li hiğmonutho d’Nuhadra bu qlimo d’Kurdistan

Ahaylawotho du gayso dı Turkiya şafici adyawma li hiğmonutho d’Nuhadra bu qlimo d’Kurdistan du Iraq, u sımlın hjome cal hın qıryawotho da Kurdoye b’gawıd du qlimo.

 Camgabıd du protesto dmahwele u Iraq mqabıl da hjome dı Turkiya, ahaylawotho du İranste sımlın hjome cal qentrune di PKK udu gabo demoqratoyo Kurdistanoyo du İran dkıtne ba narcotho du qlimo d’Kurdistan.

 Athmıl cıl mdıkrıhle u Iraq ahjome dsımla Turkiya cali fnitho d’Şigur ud’Maxmur bu garbiyo du Iraq, i şultonutho d’Anqara kımdawmo bu dyoşo di morutho du athro du Iraq. Adyawma ba şoce d’fothıd safro, ahaylawotho Turkoye şafici li hiğmonutho d’Nuhadra bu qlimo d’Kurdistan du Iraq. Lfuth u froshezwo d’Alcarabiya Alhadath, Turkiya sımla hjomo qaşyo ba topat cal hın qıryawotho bu qlimo d’Kurdistan.

Bebzabno, i wazirutho du sutoro dı Turkiya mawdacla dmabdela cuqobo folhoyo hatho bu garbiyo du Iraq, u bu buyono dıfrısla bi dafayda du nawlo mırla “u cuqobano dmahıt ışne a’Tarfone du Nimro mşarele, wa grube du Komendos şafici li fnitho d’Haftanin bi hiğmonutho d’Nuhadra”.

Camgabıdathe, i wazirutho du sutoro dı Turkiya bu vidyo dıfrısla lu tboco froso kmahwe ba hjomani kmitıstacmıli atopat wa tayısyotho folhoye du qrobo u tayısyotho hrene dılo pilot.

Meqım ma hjomani dmisomi, u gayso du Iraq mawdacwole d’18 tayısyotho Turkoye du qrobo şafıciwo lumıhreno athume oyaroye dcamu Iraq, u matınwo li mditho d’Alşarqat bi hiğmonutho d’Salah Aldin.

Camgabıdathe, i wazirutho di baroyutho du Iraq qrela u rişızgado Turkoyo bı Boğdod, u maslamlale egartho du protesto calu hjomo dsim cal hın fenyotho bu garbiyo du Iraq. Bi egarthathe, Boğdod naqla hreto tlıbla m’Anqara dmitaklın a’hjome folhoye dıkmisomi mıha gabo, u mawdacla dkıtyo hadırto dhowela methcadronutho cam Turkiya, bnişo dmitarkıwo i mşaynutho cala thume bayn du Iraq u Turkiya.

Meqım matheste, atayisyotho folhoye dı Turkiya sımwolın hjome cali qastra d’Alcimadiya bu garbiyo du Iraq, ubi netije da hjomani huwwo husrono la fenyotho di zaricutho.

Mxasra hreto, aşutose Caraboye du tboco froso mawdaclın dsim adyawma safrayto hjomo mşawtıfo mi xasra du İran u Turkiya cal qentrune du gabo di PKK udu gabo demoqratoyo Kurdistanoyo saqıbloyo du İran. Lfuth u froshezwo d’Alcarabiya Alhadath, a’noture qawmonoye du İran wa tayisyotho folhoye dı Turkiya, sımlın adyawma hjomo mşawtıfo cala qentrune du gabo di PKK udu gabo demoqratoyo Kurdistanoyo du İran dkıtne bi qastra d’Haj Cumran bu garbiyo di hiğmonutho d’Arbil.