U gayso Iraqoyo markawle folhe bdukotho frişe hedor Zaxo

Bi mawdconutho dhuwle u gerilla di PKK bu garbyo du Iraq makadlle, du gayso Iraqoyo markawle folhe bıdukotho frişe hedor Zaxo.

 A folhe Iraqoye markıwi ba thumani, leşan dsaymi u duyoqo du qlimo bnişo da hayle Turkoye dlo cubri zıttır la dukotho du garbyo du athro. Bebzabno, a hjome wa taxtuşe beyn du gerilla uda hayle Turkoye kımdawmi b’Haftanin.

Lfuth i mawdconutho dhuwle u gerilla da Haylawotho du Sutoro du Camo-HPG, u gayso Iraqoyo markawle hayle folhoye bı dukotho frişe dkıtne hedor Zaxo bu garbyo du athro leşan dsaymi u duyoqo di mşaynutho di hiğmonutho. U nişo du gayso Iraqoyo, dıqodır dmakle u şuşoto du kboşano d’Turkiya calu qlimo.

Mawdıc da hayle Iraqoye, markawlın 5 nuqazyotho stratejikoye leşan u duyoqo hedor Zaxo. I mdito d’Zaxo qaruwtoyo lu thumo d’Turkiya’yo u kıtla u tarco du thumo d’İbrahim Xalil dıkşofıc l’Mawsal. Heş me 1 bu yarho dı şafıcina, markawole u Iraq noture beyn d’Kela Şabanike u Kera.

İ HPG makadlaste, calu delqublo dkobın mqabıl da hayle kaboşe d’Turkiya b’Haftanin me 2 bu yarho dı şafıcina uholucdo wu mınyono da folhe Turkoye dı qtilın wu husrono daxilın. Me gabo hreno mawdıc, da hayle Turkoye sımlın athmıl cuqobe hathe calu gerilla di PKK dkıtyo ba turone d’Camadi u Şıladıze.

Ba turone dkıtne b’Darkar qariwo l’Zaxo, kito mınyono celoyo d’qıryawotho du camaydan. Bu zabno da cuqobani dıksaymi a hayle kaboşe d’Turkiya calu garbyo du Iraq, hol 913 Ezidoye daciri la dukothathe bu yarho d’Hziron. Mawdıc di Sictho Ezidoyto dıkmıstaqbılo u camo, makadla u dcoro da farsufani la qıryawotho d’Şigor. A Ezidoye mgalwewolın ma dukothathe mcalu cnufyo d’Dacış ba 2014.