U koalisyon d’Athra krıhle a nesyune du kboşo du kontenjan da guboye du camaydan

A hadome bu koalisyon d’Athra sımwolın meqım 2 yawme knuşyo b’Caynkawa u drışwolın a şuşote folitiqoye haroye bu wahdo du Ciraq udu qlimo d’Kurdistan, wa hedriyat da guboye da Mawtbe da hiğmınwotho dgımisomi 18 bu yarhano. Bu knuşyano, a hadire m’akadlın dıkrufdi a fulhone dkımnasın dmıştacın bu kontenjan du camaydan bu qlimo d’Kurdistan dkıtyo kbişo me KDP,

A hadome mawdaclın ducdo kmıbce dmifarıq u kontenjan du camaydan cal asas siyasi, bnişo dmıkbış u sebyono du camo Kaldoyo Suryoyo Othuroyo dıkhoye bu qlimo, u dmitahıt mnoco qume dlo mnaqe a mathlonayde. U koalisyon d’Athra bu knuşyano mqalasle u buyono dmawfaqle u makıthbo du rişono di KDP Mascud Barzani dımakadle ebe dıklozım a came umthoye du qlimo dhınne dımbayni u qadar d’ruhaye awkith dlo mmıkbış u sebyonathe me hayle baroye.

Calathe, a gabe du koalisyon d’Athra tlıblın ma hayle folitiqoye du qlimo dımtargımi u insiyativano d’Barzani b’şıkıl jıddi b’gawe du qonuno da guboye, u  dmisım u garanti du zedqo du camaydan dhuwe dımnaqe a mathlonayde, udlo mıkboşi a kursiye du kontenjan bu zabno dıkmitahwe ba casro alfayo d’qole nuxroye la mraşhe du camaydan.

Bu knuşyano, a mıştawtfone drışlın’ste a casqotho dıkloqe u camaydan bu Ciraq bu zabno dıkzaydi a hbose folitiqoye acle, ubu zabno dlıksaymo i şultonutho du Ciraq i wolitho dıknuflo acla-dilonoyith ba fenyotho di daşto d’Ninwe dıkmdawmo dcayşo u tathir d’Dacış, wu ucdo’ste u qtolcamo di mıştutho d’Bağdede. Bu huthomo, a gabe u tukose dkıtne hadome bu koalisyon d’Athra, sımlın qroyto lu camaydan dmıştawtıf b’şıkıl hfito la guboye da Mawtbe da hiğmınwotho du Ciraq, u dızze la nuqazyotho da sanduqe u dobe qolayde la mraşhe lfuth u sebyonayde u hiro.