U Mawtbo da wazire d’Urifi mzaharle Turkiya bi sbutho d’Selahattin Demirtaş

U Mawtbo da wazire d’Urifi, mzaharle Turkiya, bi sbutho du rişono zawgoyo catiqo du gabo di HDP Selahattin Demirtaş dkıtyo bu hbuşyo, mi celtho da renyayde a folitiqoye.

U Mawtbo Urifoyo bu zuhoro dımşadar la mşale d’Turkiya komır; Lo ithbate u loste hawbe sımle Demirtaş, u calathe klozım dmitarfe holu yarho d’Hziron dıbqamuthayna.

Bi egartho dımşadrole u mawtbo du huyodo d’Urifi li wazirutho di kinutho d’Turkiya u li rişqutnutho u la şutose hrene dkıtne bi mdabronutho d’Turkiya kımmi u rişono catiqo du gabo di HDP Sellahtin demrtaş msikoyo bu hbuşyo mi celtho da rınye folitiqoye dkıtle, u ba buhone dsımlan bhaq  da thome dkito bhaq dithe lı mqafelan hawbe awste bişutho hreto dıklozım foyış bu hbuşyo.

İ egarthathe du huyodo d’Urifi dımşadrolın l’Turkiya mtargamto yo lu leşono Turkoyo u kmitahke a sabab du msoko d’Demirtaş dı latne hawbe u lo sımle mede dıklozım foyış bu hbuşyo elo lıklozamwo dmitaqimowa i hasinutheyde di qoyumutho.

U huyodo d’Urifi bi egartheyde komır u bethdino baynothemwothoyo huwole fusqono d’Demirtaş dmitarfe bzabno karyo mawxa ahna xıd huyodo d’Urifi kımzarina Turkiya dıklozım marfyo le bu yarho d’Hzirin dıb qamutheyna, en dlo mitarfe inaqayo u huyodo d’Urifi gımdawım ba droşe dı mahıt tadbire cal hın farsufe idice d’Turkiya, u bu şıklano a esore d’Urifi u d’Turkiya gıdmiwatın sıttır mu mede dkito ucdo.