U Mawtbo du Forum Mısroyo b’Australia mawdele bu qtolğenso da 1915 dsim calu camaydan

U Mawtbo du Forum Mısroyo b’Australia, mawdele bu qtolğenso dsımwola i mamlaxtho da Cuthmanoye calu camaydan, calan Armınoye u Pontus Yawnoye.

U Mawtbo Mısroyo sımle qroyto li şultonutho du rişwazire Skott Morrison u mırle; Australia klozım dmawdıyo bu qtolğensano dsim calu camo Armınoyo, Suryoyo Othuroyo u Pontus Yawnoyo.

Bi maqırhonutho dhuwle u Mawtbo du Forum Mısroyo b’Australia mawdele ruşmoyith bu qtolğenso dsim calu camaydan, calan Armınoye u Pontus Yawnoye ban 1915 uholan 1923 mi mamlaxtho da Cuthmanoye.

Bi maqırhonuthathe u Mawtbo Mısroyo mırle; İ şultonutho d’Canberra klozım dmawdıyo bu qtolğensano, cal dkıtyo ğalabe ulsoyto la timoyotho di hirutho tawdithoyto ula qonune di şawyutho. A  qalilotho Mşihoye, hrimi ma zedqani bu zabno di mamlaxtho da Cuthmanoye.

U Mawtbo du Forum Mısroyo b’Australia mawdacle u snodayde lu inisyativ mşawtıfo di Kinutho bu parlamento d’Australia dımşakalwo bu yarho d’Şbot da 2020 leşan u mdoyo d’maqırhonutho dımtaybo’wa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde bu qtolğensano.

U mşalo du Komisyon dan Armınoye b’Australia, mhanele cal ışme da 3 camani i qroyto du Mawtbo du Forum Mısroyo leşan i mawdyonutho di şultonutho bu qtolğenso dan 1915.U inisyativano mde holucdo ebe me ba casrowat d’senatore u qoyume frişe, şutose u tukose dcame frişe du athro, dıksundi i mawdyonutho bu Sayfo dan 1915.