15/09/2021

U rişono d’USUP İbrahim Murad sımle socurutho lu qentrun di sdirutho d’Zahle

U rişono du gabo du Huyodo Suryoyo Tibeloyo d’USUP İbrahim Murad, sımle socurutho lu qentrun di sdirutho d’Zahle.

Bi socuruthayde, Murad laqi menyono d’wazire u qoyume catiqe ma gabe rabe Mşihoye d’Lebnon.

U rişono du gabo du Huyodo Suryoyo Tibeloyo d’USUP İbrahim Murad, athmıl sımle socurutho lu qentrun di sdirutho d’Zahle, bnişo dloqe u rişono wa hadome di sidrutho, udmoyıd mawdconutho m’qariwo cala fulhone dıksaymilın bi mditho d’Zahle.

Murad bi socuruthayde, laqi u waziro u qoyumo catiqo du gabo da Katayeb Lebnonoye Mşihoye Eli Maroni, ulaqi ste u qoyumo catiqo du gabo da Haylawotho Lebnonoye Şant Janjanyan. Li ytawtathe mıştawtafle ste u notarrozo gawonoyo du gabo du Huyodo Suryoyo d’USUP Mişel Mallo.

Bi lqoytathe, Murad wa tre qoyume drışlın a’şuşote folitiqoye haroye d’Lebnon u  mın tathir kibe dhowelın calu kriz momunoyo u kenşoyo du athro. Bebzabno, a’tlotho gabe dıgrışlın u zuhoro cala krize dkımdawmi bu madınho mescoyo bu maşıqlano ducdo, mathkarlın ste dlıkmıtyaqni dmisomi a’şuhlolfe rabe dıkmıntır dhowın b’Lebnon yaste dmiqafe şroyo la krizayde, cal di şultonutho hathto dımşaklo bi rişonutho d’Nejib Miqati naqla hreto kbıştoyo mu grub d’Hizballa dkıtyo u gefo mzayno du İran b’Lebnon.

M’gabo hreno, Murad makadle dıklozım dmicaqbi a’fulhone gawoye u baroye dıkmisomi laşan du huroro d’Lebnon mu kboşo İranoyo, udmişatıs gbino moronoyo dhowe morıd tahrazto qrihto u zalılto, laşan dmisarhıb bu texliso d’Lebnon mu kaboşo İranoyo.

Bu huthomo di lqoytathe, Murad, Maroni u Janjanyan matın l’awyutho dımdawmi aminoyith i mşawronutho wi methcadronutho dbaynothaye, ba sebwotho athronoye u moronoye mşahılfe.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…