U Rişqutno du Iraq mdele u qonuno dmitahwe tazminat la neşe kule dmaxlaslın me Dacış

Bıthır mıd u parlamento du Iraq mıctarafwole bu qtolcamo da Ezidoye u cala came, u maqbewoleste qonuno hatho, klozım i şultonutho du Iraq dobo tazminat la neşe kule dmaxlaslın me Dacış ba 2014.

Athmılste bu yawmo d’8 Odor, mdele u rişqutno Barham Salıh calu qonunano leşan dfoyıt ruşmoyith la haye.

U parlamento du Iraq, mayadwole qonuno di mawdyonutho da gunhe du qatlo u du htofo dsımwole Dacış cala neşe u cala nacime Ezidoye u da came hrene umthoye u tawdithoye du Iraq, dıkşowın lu darğo du qtolcamo u da gunhe mqabıl di noşutho.

U qonuno mahıtwo ışme u qonuno da neşe Ezidoye dmaxlaslın mu qtolcamo, klozım i şultonutho du Iraq dobo tazminat la farsufe dmaxlaslın me Dacış. Ubu qonunano sımwo’ste qroyto l’Boğdod dmişatıs daira dıkmidabro mi şultonutho, bnişo dmınfıq moro la neşe ula farsufe kulle dmaxlaslın mu qtolcamo, udmicadri leşan dmitarkıwi me hatho bıgawe du kenşo.

Calathe athmıl dkıtwe u yawmo d’8 Odor, u rişqutno Barham Salıh mcayadle a neşe du athro kulle ubi ithutho d’neşe Ezidoye dmaxlaslın ma marhıbone, mdele ruşmoyith calu qonunano u mırle; Kıtli şubhoro dımdeli calu qonunano leşan u snodo da dıbhe di marhıbonutho-a neşe Ezidoye, Mşihoye, Turkmanoye u Şabak.

U qonunano mde bu salon rabo du parlamento qum da hadome kulle, du rişono du parlamento, du koalisyon rabo d’Cammar al Hakim, du dayono du bethdino celoyo du athro udi mathlonitho Emwothoyto bu Iraq Jeanine Hennis-Plasschaert-dımcayadlın u yawmo Emwothoyo da Neşe Falıhyotho dı britho.