U rişwazire du Iraq mawdacle u farsufo dıkmıthım bu qatlo d’Alhaşimi

Amşawrone du rişwazire du Iraq Mustafa Alkazimi, mawdacle du farsufo dıkmıthım bu qatlo du mbahnono bu haqlo di mşaynutho Hişam Alhaşimi, kıtle esore cam grub mzayno ma grube dıkmısnodi mu İran.

Amşawrone d’Alkazimi, mawdaclınste di aykanoyutho folitiqoyto du Iraq gıdmifarqıco ida dothe dmitagle calu haylo dkıtyo bıthır du qatlo d’Alhaşimi.

Amşawrone du rişwazire du Iraq Mustafa Alkazimi mawdaclın dkıtne mdamre mu darğo du cnufyo dmati li halıqto gawoyto dkıtyo qaruto m’Alkazimi, u grışlın u zuhoro calu suikast du qatlo du mbahnono Hişam Alhaşimi dkıtwe qariwo l’ğalabe menaye.

Cıl mıdlımagle hul ucdo cali hiyoyutho du qatolo b’şıkıl ftiho, elo amşale Iraqoye kmawdıci du qatolo d’Alhaşimi kıtle esore cam grub mzayno ma grube dıkmısnodi mu İran udkaliwo Alkazimi b’fothaye mu zabno dmıdwole i wolithayde bu yarho d’İyor dşaficina.

Bu zabno dkımdawmi ucdo a’buqore calu qatolo d’Alhaşimi bi rişonutho du mcadrono du waziro di gawoyutho, amcadrone d’Alkazimi wa bnayqyomayde afolitiqoye kımmi “i aykanoyutho folitiqoyto du Iraq kiba dmifarqıco b’şıkıl ğalabe rabo, ida dothe dmibayın u haylo dhule u amro du qatlo d’Alhaşimi”.

Ha ma mşawrone d’Alkazimi dırfıdle dmagle cal ışme, mırle “u ftoho da buqore kamile cali sbuthathe, bıfşitoyith kıtle qento rabo ğalabe cal kul rişwazire harke”.

Bebzabno, hın ma yadıcthone ba sebwotho folitiqoye du Iraq mırlın “Alkazimi hawi u debho di qale qşitho dkito bayn du rişwazire Alkazimi wa grube mzayne. Wu medano falqo dıqrobo rabtıryo bayn d’Amerika wu İran calu şultono b’gawıd du Iraq”.

Megabo hreno, Alkazimi adyawma hule amro dmisım buqore cala gedşe dhawın athmıl bu wahdo d’Altahrir bı Boğdod, u dıqtil ebaye tıre mtagılyone u mjarıhste ba casrowat hrene ba buğre dmarıs aclaye ma haylawotho di mşaynutho.

Hathe i naqla qamaytoyo dıkmitayıb taglitho du protesto, u kmitarıs eba buğre cala mtagılyone mu zabno dmıdwole Alkazimi i wolithayde xıd rişwazire du Iraq bu yarho d’İyor dşaficina u hul ucdo.