U tahlufo du rişono du parlamento d’Turkiya Sırrı Süreyya Önder nqil ma haye bi bethkrihe d’Stanbul

STANBUL – Malolo mu gabo d’DEM huwle u tebo mahişono du şunoyo d’Sırrı Süryya Önder dkıtwe qoyumo du gabo, tahlufo du rişono du parlamento d’Turkiya u hadomo bi taşdarto d’İmralı, nqil adyawma bıthır me falge d’yawmo ma hayani bi bethkrihe. Önder nqwılwo 15 bu yarho d’Nison la bethkrihe mi celtho d’kriz du lebo u sim b’surhobo camaliye. Elo i aykanoyutho du hulmonayde lo mcadlowa u fayışo ba bethkrihe.

Cali aykanoyuthathe d’Önder’ste, mınyono celoyo dfolitiqore u mşale d’gabe u b’Turkiya Turkoye mawdaclın u snodathe ele, u mawde ebe’ste xıd farsufo ulsoyo-dilonoyith bu maşıqlano da droşe du şlomo b’Turkiya. U qoyumo Önder dkıtwe Turkmanoyo idicoyo’ste bi asirutho dıkmahwe la came frişe d’Turkiya; acmaye’ste u camaydan u Suryoyo.

A haye du folitiqoro, Önder dkıtyo mawlodo dan 1962 b’Adıyaman, malye ağono leşan i hirutho wi kinutho’wın u mahıt zabne frişe frişe bu hbuşyo calu renyo dkıtwole. Ban 1978 msıkwo lu hbuşyo cal dmıştawtafwole l’taglitho dımtaybowa mqabıl du qtolcamo dsımwo b’Maraş u bıthır mu mawto du babo, mıdwole mşalutho dımdabır i iqartho.

Bu zabno du inqilab da 80’yat, trewole mi bethsawbo u mahıtwo 12 eşne bu hbuşyo u mafıtwo b’teşniqe qaşye. Ba 2003’ste huwole yuqro li sinema u sımwole flime frişe u qmırwole’ste şukone aclaye u frıswole mimrotho b’sfaryawme Turkoye. Ba 2011 mnaqewo qoyumo bu gabo d’BDP uba 2013 qoyumo bi HDP. Ba tagliyotho d’Gezi, mçarahwo Önder ma hçome du polis ubcayni şato, mıdwole’ste duktho bi taşdarto d’İmralı leşan a droşe camu rişono Kurdoyo Abdullah Öcalan.