U taşroro dıfris kmawdıc u timo du husrono dıtrelın a hçome wa taxtuşe dhawın cala qıryawotho d’Zaxo mati zıttır me milyon dolare

A qıryawotho wa fenyotho du garbyo d’Nuhadra; beynothaye qıryawotho du camaydan, hzelın husrono rabtho ma hçome da hayle Turkoye uda taxtuşayda dcamu gerilla di PKK.

Lfuth u taşroro dfris bi dafo d’Rudaw, u timo du husrono dtrelın a hçome wa taxtuşe dhawın bu qaytano lhude cala qıryawotho d’Zaxo, mati zıttır me milyon dolare.

‘Mahıtlan hol 7 alfo dolare calu bnoyo du baytaydan, elo Turkiya mahrawla wu ucdo azze u tacbawo kule. Jbirina dmahzımina-ahna u zawalaydan l’qritho hreto’ a melani dha ma comure di qritho d’Bıhere b’Zaxo’yo. Bu taşroro dfris bi dafo Kurdoyto d’Rudaw, griş u zuhoro calu husrono dtrelın a hçome da hayle kaboşe d’Turkiya cala qıryawotho u fenyotho du garbyo du Iraq.

Lfuth u taşrorano belhude bu qaytano d’şafıc, u timo du husrono dtrelın a hçomani d’Turkiya cala bote da qıryawotho frişe du garbyo d’Zaxo, zıttır me milyon dolare’yo. Hın ma qıryawothani hariwi wa comure jbiri dmahzımi lğer dukotho u noşo law dacır li qrithayde.

Gawonoyith a hçomani d’Turkiya dımşarewolın bu yarho d’Nison d’şafıcina, huwlın husrono l’22 qıryawotho d’Zaxo. Bu zabno da hçomani d’Turkiya’ste, mınyono ma comure mçarhi. Camgabe da qıryawotho, 28 dukotho da socure-da turist m’athri-beynothaye i şorşitho d’Şaranş.

Li dukthathe kull şato ızzewo hol 20 alfo socure u cobarwo beyn 20-30 alfo dolare i şato. Hol 50 qıryawotho u dukotho da socure di fnithathe hzelın husrono dıkmote l’milyon u 600 alfo dolare. 30 qıryawotho d’Zaxoste maxlın ma comurathe me 24 bu yarho d’Nison uholucdo mcal fothe da hçome d’Turkiya cali PKK.