U tboco froso d’Kerxıslox mşalatle bahro cali sbutho du kboşo danarcotho du camaydan

U tboco froso d’Kerxıslox u du qlimo d’Kurdistan du Iraq, mşalatle bahro cali sbutho du kboşo da n’arcotho u mulkone du camaydan bu garbiyo du Iraq.

 Hın maşle u more da mulkone du camaydan bu garbiyo du Iraq, ba maıqblınwotho dsimi acmaye, mawdaclın dcıl mıdmid fuqone ma botaydino du qlimo d’Kurdistan, elo a’mulkonaththe hul ucdo lımmadıcri elaye. ubebzabno thımlın i şultonutho d’Arbil dkıtyo hiyyaste taraf ba dyoşe dkowın cala mulkone du camaydan.

 İ sferyawmo d’Aawine dıkmıfroso bu qlimo d’Kurdistan du Iraq, frısla mawdconutho rwihto cali sbutho da dyoşe uda kboşe da bote, arcotho u mulkone du camaydan dıkhoye bu garbiyo du Iraq, u mıdla u taşroro di sferyawmo d’Kerxıslox Now asas di mawdconutho dıfrısla cali sbuthathe. Camgabıd di mawdconutho rwihto, i sferyawmo d’Aawine frısla ste surto dkiba hdo ma şawthawotho catiqe du camaydan b’Nuhadra wi şultonutho d’Arbil kmınco u camaydan dsoyım u hethotho da botayde dkıtne bi şawthathe.

Ba maqıblınwotho dsimi cam menyono ma mşale u more d’arcotho u mulkone du camaydan, İşo Yaqo dkıtyo ma comure di qritho d’Xelan di qastra d’Caqra, bi maqırhonutho dhule l’Kerxıslox Now, mawdacle da caşıryotho Kurdoye dıkmısnodi mu haylo di şultonutho du qlimo, kbışlın tlotho donımat mi yarcayde, ucıl mıdmid fusqono mu bethdino d’Caqra dmitadcarle u mede dıkbiş mi yarcayde, elo a’caşıryotho Kurdoye lıkmahwın yasifutho lu fusqono du bethdino wa tlotho donımat di yarcayde hul ucdo kbişene. Yaqo mırleste “a’mşale du qlimo ktılbi menayna dımdena şbuqyo cama caşıryotho Kurdoye udmıfloği an’arcotho baynothayna, elo ahna krıfdina kulonoyith u medano, u mın dhowe ahna lıgıdtorina an’arcothaydan, elo ktılbina mi şultonutho du qlimo dmafito a’fusqone da botaydino la haye, udmadıcro u zedqo la morayde”.

U kohno di marcitho d’Caqra qaşişo Andriyos Mixayel, bi maqırhonutho dhule l’Kerxıslox Now mawdacle dkito dyoşe cal arcotho dkıtne a’mulkone d’150 yaqrotho du camaydan, baynothaye bneste bote u benyone ebaye b’şıkıl lo qonunoyo. Lfuth taşroro rwiho dmaslım li şultonutho d’Arbil, kito kboşe u dyoşe dsimi cal arcotho du camaydan dkıtne b’54 qıryawotho bu qlimo d’Kurdistan, falgaye heş dılo şroyo ne.

Bu taşroro dıfrısla i sferyawmo d’Kerxıslox Now, kmıgrışı ste u zuhoro calu qetro da n’arcotho du camaydan b’Caynkawa, u kmitawdıc dımqadım talabe u şkuwwat m’223 yaqrotho du camaydan lu parlamento uli şultonutho d’Arbil, elo hul ucdo balhude 40 yaqrotho hew elaye tezminat mqabıl du kboşo da n’arcothaththe. Bebzabno mawdıc ste bi sfreyawmo Kurdoyto d’Aawine dımşatıs sicotho laşan u şroyo du kriz da n’arcotho d’Caynkawa, elo a’sicothani hul ucdo lımmatın l’netiçe.

U hadomo du mawtbo di hiğmonutho d’Nuhadra Linos Codişo mırle “bi şato da 2018 mşataswo sictho dkıtwi hadomo eba. Ubıthır ma fulhone u socurwotho dsımwolan, mqadamwoli ıno farsufoyith taşroro rwiho li şultonutho d’Arbil. Ubıthır mdımcaqabwoli i sbuthathe, mtamarwo eli du taşrorano lımmatiwo lu mawtbo da wazire cıl mıdıno mqadamwoli”.

Camgabıdathe, u mdabrono gawonoyo da sebwotho da Mşihoye bu qlimo d’Kurdistan Xaled Alber, makadle di şultonutho d’Arbil taraf rişoyoyo ba qetre uba dyoşe dıkmisomi cala n’arcotho du camaydan, u mawdacle ste di sbuthathe kımlakho u kmapiso i surto du qlimo.